王大陸剃寸頭入伍服役 對傳媒包圍不發一言表現無奈

現年33歲嘅台灣藝人王大陸雖然受多宗官司纏身，但依然要按規定入伍服役，3月13號朝早，大陸以役男身份，喺集合時間9點前壓線到達集合地點。被台灣傳媒形容係「最強役男」嘅大陸，冷帽加口罩，以全身名牌裝束出現，宛如巨星駕到，現場瞬間陷入混亂。
王大陸面對傳媒嘅提問不發一言
大陸面對傳媒嘅提問一言不發，同其他役男一齊席地而坐等接送專車，期間神情略顯疲倦。到咗出發時間，一行人移動致月台預備搭9點半班次專車，不過專車延遲20分鐘，成個月台都被傳媒包圍，現場一片混亂，連帶影響其他役男無法順利排隊，不時聽到有役男抱怨聲，而一旁嘅大陸亦表現得相當無奈。並無家人朋友送行嘅大陸，喺等車期間見同行男有親友送別，更溫馨攬攬告別，大陸都特別一望再望，似乎覺得自己份外孤單。
王大陸神情略顯疲倦。
最後大陸喺9點52分順利登車，並喺中午時分到達台中，落車後大陸除下冷帽，露出已經剃好嘅寸頭，預備轉車到成功嶺展開21日新兵訓練，而結束新訓後佢就會以替代役身份服役一年，至於會分配到邊個單位服役就要四月份先知。
王大陸落車後就除掉冷帽。