電影泉攻略丨出爐奧斯卡影后星途大好 Ben Affleck新戲精彩片段搶先看丨EP146

又到每個星期嘅《電影泉攻略》，主持王鎮泉帶你緊貼最新電影資訊。
電影泉攻略
今屆奧斯卡新鮮出爐影后Mikey Madison今年只有25歲，佢憑電影《阿諾拉》成功擊敗大熱嘅Demi Moore，的確令唔少人大跌眼鏡。Mikey本身係一名馬術競技選手，但自從佢14歲時報讀演戲課程之後，成個人生就唔同晒，除咗19歲喺《從前，有個荷里活》當中嶄露頭角之外，近年都喺唔少作品例如《奪命狂呼5》裡面有搶眼嘅表現。而自從攞獎之後，佢嘅身價亦水漲船高，好多導演想搵佢合作，甚至有傳連Marvel都已經鎖定佢出演一個秘密角色。
今屆奧斯卡新鮮出爐影后Mikey Madison
另外講到動作片，相信唔少鍾意動作片嘅朋友一定有睇過《暗算》呢部電影，相隔9年，呢部電影嘅續集《暗算2》最近喺一個影展舉行全球首映，通常續集電影嘅評價多數好一般，但呢套就反而被外界譽為更勝前作，整體口碑非常好。今集繼續搵嚟Ben Affleck、Jon Bernthal、JK Simmons等原班人馬演出，而且今次Ben Affleck同佢好兄弟Matt Damon仲係聯合監製，唔知係咪因為咁，今次描述兄弟情嘅篇幅多咗，有好多緊張動作場面之餘亦多咗唔少喜劇元素，雖然香港暫時未上畫，不過《電影泉攻略》就搶先為大家送上精彩片段。
Ben Affleck同好兄弟Matt Damon做聯合監製。
本週嘅新片速遞有《無痛俠》，因為夢中女神俾人脅持做人質，平時符符碌碌Nathan，終於有機會一展所長，將佢獨有嘅「零痛感」特異功能，化為搶救女友嘅獨門武器，原來有時無feel都可以做返次英雄呀！

《孤獨的美食家》，從事進口雜貨貿易嘅井之頭五郎，收到前女友嘅女兒千秋嘅請求，要飛往法國巴黎拜訪千秋嘅爺爺一郎。呢位老人家想再飲返細個時候嘅一碗湯，於是拜託五郎環遊世界尋找極品煮湯食材同食譜！但係喺佢搵湯嘅同時，所到之處竟然遇到各種各樣嘅人同事，漸漸捲入咗更大嘅事件當中。

《ZEROBASEONE THE FIRST TOUR [TIMELESS WORLD] IN CINEMAS》，ZEROBASEONE 首個世界巡迴演唱會電影，呢隊九人男團喺出道第一年就取得重要嘅里程碑，喺首次世界巡演中吸引咗8個城市嘅20萬名粉絲，電影除咗有現場表演、後台視角之外，仲會有一系列滿足粉絲嘅真情訪問。

至於本週票房龍虎榜，截至3月12號中午，第三位《看我今天怎麼說》；第二位《米奇17號》；第一位《哪吒之魔童鬧海》。