吳若希預告將主持全新綜藝 自嘲過往愛情經歷小巫見大巫

吳若希Jinny 呢日與 莊子璇Hilary、為大會擔任司儀嘅 周奕瑋Jarvis 及 潘靜文Sherman 現身一個活動，Jinny之前透露會主持一個全新綜藝節目，節目尚喺招募階段，但Jinny就話暫時收集到嘅愛情經歷經已好爆，佢話自己過去嘅愛情經歷同節目中嘅個案相比，簡直係微不足道，所以亦唔打算邀請老公做嘉賓。至於拍檔方面，Jinny就預告會係一位從未合作過嘅大前輩。
吳若希
而Jarvis啱啱同好友麥美恩以及駱胤鳴去咗新加坡旅行，不過成個行程佢竟然忘記咗Mayanne生日，Jarvis解釋因為太熟所以先會唔記得，好彩Mayanne都冇嬲佢，返到香港之後亦都已經補食咗生日飯。
周奕瑋 同 潘靜文呢日齊齊擔任司儀。
Hilary最近喺網上發文透露自己嘅爸爸一度病危，令佢相當擔心，事源莊爸爸早前入院做完通波仔手術，但心跳突然停頓，經搶救後醒返一度留醫ICU。Hilary呢日就話多謝大家關心，依家爸爸已經轉到普通病房，但依然需要時間靜養，一家人會齊心協助爸爸康復。
莊子璇呢日分享爸爸身體狀況。
Sherman最近考獲車牌，作為新牌仔嘅佢早前都好大擔咁載Chantel同Felix遊車河，為咗進一步提升車技，Sherman仲頻頻向爸爸請教，過程中意外重拾爸爸教功課嘅溫馨感覺。