星光路上丨鄧英敏感恩成長階段無拘束 緣份令佢踏上半世紀演藝路

有「屯門王子」之稱嘅鄧英敏 作客《星光路上》接受主播 潘盈慧 專訪，敏哥自言樂觀性格受成長過程影響，佢感恩父母令佢喺成長中無拘無束，享受百分百嘅自由生活，同鄰居扒艇仔，又可以免費睇戲，佢話當時睇咗唔少蕭芳芳同陳寶珠等作品。
鄧英敏喺節目中分享自己嘅成長經過。

敏哥話雖然睇咗唔少電影作品，但當時對演藝工作都未有興趣，即使小六時被老師揀選演話劇飾演國王。直至中三嗰年，學校參加校際話劇團比賽，但出任男主角嘅同學因為太驚而病倒辭演，點知老師搵咗唔係話劇團成員嘅敏哥頂替，角色要演一名毒癮發作嘅人，演完之後佢覺得好好玩。到畢業後，佢留意到頭兩期演員訓練班嘅畢業生發展幾好，於是就投考第三期，仲投考成功。
敏哥亦有分享自己嘅演藝生涯。
敏哥話訓練班畢業後，演藝路算係暢順，可能自己夠多元化，之後搬到廣播道居住時，工作量更增多，因為住得近公司，好多臨時工作都搵佢，當時連周潤發同杜琪峯等現今重份量人物都一齊住過。入行超過五十年，敏哥依然長青不老，佢都特別同大家分享秘訣。