Alfred吳林峰網友變老友 11月會展開騷岑寧兒任嘉實

許廷鏗同吳林峰宣布11月聯手舉行音樂會，佢哋以「家」為主題，仲邀請咗「鄰居」岑寧兒擔任嘉賓，三位實力派歌手首次聚頭，相信又會掀起一輪撲飛熱潮！

Alfred同吳林峰幾年前因音樂相遇，最終由網友變為同台開騷嘅好拍檔，佢哋仲話今次嘅合作非常奇妙。吳林峰重提當年知道Alfred喺直播點名提到自己，興奮到膽粗粗喺社交平台私訊對方，佢話：「我當時真係好開心，即刻私訊Alfred多謝佢，佢又讚我唱歌好聽。之後就咁樣開始傾偈，當時我好迷惘，佢畀咗好多鼓勵同方向我。」

Alfred就話當初喺網上腸到吳林峰街頭Busking片段時，好似見到初出道嘅自己一樣：「我對佢嘅表演好有印象，諗起啱啱入行嘅我，好自由自在，想唱咩就唱咩，唔使有任何商業考量。」

自此之後佢哋就不時相約交流音樂，互相扶持關係猶如一家人，Alfred話：「我覺得同吳林峰相處好自在舒服，好似一家人咁，希望我哋呢種家人嘅感覺可以延伸畀觀眾，令大家入場睇今次音樂會都感覺到家嘅感覺。」

吳林峰指舊年開騷邀請Alfred合唱後，一直希望可以合作舉行音樂會：「我收到呢個消息嗰陣簡直覺得係夢想成真，立即搵吓有咩歌可以同Alfred一齊唱。加上我喺攞獎時都曾經多謝過佢，我希望可以喺呢個騷做到答謝Alfred嘅效果。」至於Alfred表示一直期待呢個組合出現：「好似冇乜機會喺大眾平台畀大家了解到我哋，講出嚟又太肉麻，反而依家用好音樂交代最合適。」