韓團SUPER JUNIOR大馬開騷High爆 港迷期待騷肌福利

由寰亞娛樂主辦嘅《SUPER SHOW 9 : ROAD IN HONG KONG》將於11月19號至晚上7點及11月20日晚上5時，一連兩場喺亞洲國際博覽館舉行，E.L.F已準備「搶戰」。

SJ剛完成馬來西亞巡演，成員厲旭換上新金髮色，銀赫非常調皮，開騷時多次抽水摸始源Pat Pat，令歌迷笑不停，東海多次大力向觀眾送上飛吻，在場歌迷尖叫震耳欲聾。

圭賢跳《Devil》時一度跳錯舞被神童睇到，兩人喺台上禁不住大笑，之後圭賢尷尬地以簡單英文向在場歌迷打招呼，不斷數Strawberry, Blueberry等，歌迷忍唔住大笑，最精彩讓歌迷超級興奮就係，始源因為玩得太開心，熱到飛起，大方除衫騷肌，引爆整個場館，歌迷狂叫10分鐘。

騷後SJ幾乎引來另一個「核爆」，SJ大馬歌迷會突然向所有歌迷發公告，叫大家即時刪除始源台上脫衣服嘅相，勿貼上任何社交平台，保護SJ及主辦單位，點解咁大件事？因為馬來西亞係回教國家，演唱會赤裸上身係宗教大忌，為免宗教局搵主辦方，影響將來SJ去大馬演出嘅機會，所以懇請大家刪相刪片，寫上「保護哥哥們大家有責」，E.L.F得知消息，始源網上騷肌相竟然瞬間消失，可見SJ 歌迷多麼愛護 SJ！

有香港歌迷於粉絲團留言叫哥哥快啲嚟香港，呢邊等佢哋全部除衫，冇宗教局會搵上門。另有香港歌迷話SJ嚟港時，香港已經開始凍，唔知佢哋會唔會換上最新冬裝，香港歌迷享受唔到騷肌福利，「請始源不要偏心，香港也要盡騷一次」！