真人騷綜藝節目《香港小姐再競選》,將會喺今個星期六(29號)播出,一眾參選佳麗包括1號 梁允瑜 、2號 蔡菀庭 、3號 陳懿德 、4號 黎寬怡 、5號 李天縱 、6號 李芷晴 、7號 賴彥妤 、8號 鄺靜汶 、9號 黃婉恩 、10號 王嘉慧 、11號 何沛珈 、12號 關楓馨 、13號 麥皓兒 同埋14 號 莫韻諰 。佳麗位位都可以話係臥虎藏龍,當中「東張西望」女神3陳懿德同憑《愛‧回家之開心速遞》中角色人氣急升,被譽為「姣精」嘅11號何沛珈表演更相當耀眼。
中文大學新聞及傳理系畢業嘅陳懿德(Rachel),2021年曾入圍港姐最後8強,當時短短三個月內激減22磅踏上競選舞台;經過一年,Rachel愈減愈勇再瘦多1.5公斤,腰圍由25吋減至23.5 吋,上圍亦上升0.5吋。
除咗減肥有道,本身有聲樂八級實力嘅Rachel才藝環節表演腹語,除咗同拍檔「癲癲」對答搞笑仲輪流獻唱。Rachel 為了呢次表演首度接觸腹語,不過表演時完全冇破綻,事後佢仲透露係極速解鎖新技能:「我只係學咗兩堂就要上台,主要靠私下不斷練習,因為其間要做《東張》同埋為呢個節目做排練,所以就要偷啲休息同食飯時間練習,就算凌晨兩、三點返到屋企都繼續練,因為我對自己要求好高,唔可以淨係做到,要做好!」
Rachel 又坦言學腹語難關多多:「首先搵老師已經好難,然後係keep住個口唔郁,最難係
唔只把聲,連個腦都要切換得好快,否則手口唔協調就會穿崩,我諗今次之後,我可以試
吓拍人格分裂嘅戲。最搞笑係我返到後台有人問我:『你錄定音定配音架?』至於減肥心得,Rachel就話最瘋狂時完全戒絕油鹽糖,三個月只食白烚蛋白質,再加每朝空腹跳繩400下:「上年參選時我成日覺得自己未夠好迷失咗自己,而家我認為更重要係喜歡每個當下嘅自己。」
而2020年五強佳麗何沛珈(Roxanne),就會表演混合美態同力量嘅傣族舞,化身象徵美麗同智
慧嘅「孔雀」為觀眾送上祝福,曾喺《愛‧回家》中大跳椅子舞嘅Roxanne,自細已經係舞林高手,佢又透露為咗比賽首度接觸傣族舞,花咗一個月時間學習:「有半個月係學基本功,呢隻舞外柔內剛,充滿內在力量,但因為我嘅肌肉量唔夠,所以減重同時又要做重訓。」
Roxanne 續指專誠找來演藝學院老師幫忙排舞及訓練:「呢隻舞要求嘅柔軟度比我平時再勁多一倍,特別係要開肩開胯下腰,老師仲會踩住我幫我落得低啲,感覺同生仔一樣咁痛。」Roxanne 又感激製作組炮製呢個節目:「落選港姐唔等於輸家,反而我哋會因為咁更加去努力。我相信龜兔賽跑,烏龜只要有堅毅不屈嘅精神,並唔比兔仔差。我哋都可以透過自身努力同求進步嘅心令自己更好,我哋就算落選都係有質素嘅港姐。」