我們的主題曲丨葉麗儀《上海灘》為四個字錄足兩粒鐘黎耀祥唱《義海豪情》插曲有段故

TVB全新綜藝節目《我們的主題曲》噚晚嗰集主題「古裝/民初劇篇」，請來袁偉豪、陳山聰、譚俊彥、張馳豪、冼靖峰、黃奕斌（Hugo）、呂方、譚嘉儀、黎耀祥及葉振棠先後獻唱《上海灘》、《雪山飛狐》、《巾幗梟雄之義海豪情》插曲《紅蝴蝶》及《戲班小子》同名主題曲。

張達明、黎耀祥、李琳琳、姜大衞及石修，先後分享《狀王宋世傑》、《巾幗梟雄》系列、《楊門女將》、《女拳》及《英雄出少年》拍攝點滴，大談民初劇、古裝劇及動作場面拍攝苦與樂。

張達明分享《狀王宋世傑》嘅拍攝點滴。無綫經典劇集之一《狀王宋世傑》，由張達明和郭藹明主演，當年播出時平均收視31點。

黎耀祥獻唱《巾幗梟雄之義海豪情》插曲《紅蝴蝶》。

葉振棠、Archie冼靖峰跨代合唱電視劇《蘇乞兒》主題曲TVB經典武打電視劇《蘇乞兒》。姜大衞亮相節目分享感受。石修講古裝劇及動作場面拍攝苦與樂。

李琳琳指拍攝《楊門女將》由於大熱天時，自己有一套獨門消暑方法：「話晒夏天，成班女將著晒古裝又要打，我自己就會帶住一塊冰嘅毛巾，拍完一個鏡頭就即刻High落塊臉度涼一涼，否則出汗會搞溶個妝。」

李琳琳拍《楊門女將》時出動冰毛巾消暑。李琳琳喺劇中飾演「楊八妹」楊延琪。《楊門女將》由王天林監製，汪明荃、馮寶寶、石修等主演。
《上海灘》同名主題曲演唱者葉麗儀，大談當年錄製這首街知巷聞主題曲趣事。葉麗儀透露當年係作曲顧嘉煇（輝哥）點名要佢獻唱，佢專程回港錄製，唱功出名了得嘅葉麗儀，笑言當年為咗頭四個字「浪奔浪流」花咗不少功夫，唱咗成兩個鐘頭先至肯收貨。

葉麗儀獲顧嘉煇點名唱《上海灘》，當年淨係「浪奔浪流」呢四隻字，要錄足2粒鐘先收貨，力臻完美。
葉麗儀感恩有機會獻唱《上海灘》，並指歌曲至今對佢影響甚深：「真係唱到今日，開演唱會唔唱呢首歌都唔落得台。」至於與譚嘉儀以全新組合獻唱《雪山飛狐》嘅呂方，笑指當年一直冇機會與合唱者關菊英碰面：「直到三十幾年之後喺顧嘉煇演唱會，先第一次喺台上合唱呢隻歌。」

呂方當年同關菊英合唱《雪山飛狐》，但兩人一直未有機會碰面，要三十幾年後喺顧嘉煇演唱會先迎來第一次合唱。
黎耀祥為劇集《巾幗梟雄》擔任男主角當年紅極一時，直指「柴九」將佢嘅事業推向另一台階：「其實當時嗰種受歡迎係始料不及，我覺得可能係觀眾（將柴九嘅生涯）對比咗黎耀祥嘅演藝生涯，所以當柴九由小人物慢慢爬到頂點時，大家好支持柴九，亦同時好支持黎耀祥。『人生有幾多個十年』，呢句說話對好多人都係好大嘅激勵。」

黎耀祥直指「柴九」呢個角色係人生轉捩點。黎耀祥當年佢仲膽粗粗自薦唱《紅蝴蝶》。
黎耀祥續指拍攝《巾幗梟雄之義海豪情》時，由於劇情講到劉醒與九姑娘因為戰亂分開，故兩人不斷尋找對方，當時編劇為咗更確切反映劉醒心態，喺劇本寫咗《巾幗》主題曲《紅蝴蝶》歌詞，以致黎耀祥做咗一個「大膽」舉動，當時膽粗粗同監製添哥（李添勝）講，黎耀祥想用「劉醒」第一身感情去唱呢首歌，等觀眾更加投入，如果曲詞同角色脗合，佢覺得由演員唱主題曲係一個優點。