《潛規則》主持慈善跑籲保育 古天祥潛水族館日日曬命

myTV SUPER原創節目《潛規則》嘅主持李君妍、魏韵芝、葉泓聲、古天祥同何泳芍，除咗喺節目當中潛水去到香港唔同秘境之外，呢日亦都現身一個保育慈善跑活動，希望為香港生態保育再出一分力呀。

入水能遊嘅佢哋，呢日通山跑似乎都冇乜難度，唯獨係Joyce似乎有少少辛苦，佢就解釋話因為早前曾經染疫未完全回復狀態之過喇。至於最Fit嘅Honey，就話天氣涼爽之下跑步完全冇問題呀。

佢哋齊齊主持嘅節目《潛規則》，播出之後反應不俗，呢日Gordon就大爆拍攝時要由Honey喺水底拖實手仔勇救，佢哋仲擔心之後傳緋聞呀。而古天祥就話一班潛友都希望有節目會介紹香港世界級嘅水底世界，一班老友知佢有機會喺主題公園水族館浮游仲非常羨慕呀。