共融弦樂丨小提琴手Roy為囡囡學煮蕃茄炒蛋 走出陰霾用生命影響生命

「香港共融樂團」由傷健人士組成的樂團，先後跟張學友及陳奕迅合作表演，舞台成績有目共睹，但離開舞台，一班團員樂手嘅生活同人生，如何克服自身缺憾，喺音樂領域上獲得認同。

J2（82台）一連6星期逢周六晚上 7點半播出嘅節目《共融弦樂》，搵來6位團員，分享各自生活點滴，分別有小提琴手陳海釗（Tom）及岑幸富（Roy）、拉二胡嘅楊恩華、豎琴手陳蔚斯（Iris）、吹小號及彈鋼琴嘅沈小筵及同是彈鋼琴嘅鄧浩研（Chris）。三位J2ers吳兆麟（Alan）、林沚羿（Venus）、布樂文（JB）同佢哋夾歌合奏，分享音樂以外嘅興趣、喜好，感受佢哋知性一面，喚起大眾對傷健人士認同，達至共融和諧。

11月26日號播出《共融弦樂》，今集主人翁係「共融樂團」小提琴手岑幸富（Roy），佢拉出一曲《父母恩》為節目揭開序幕。
作為兩個囡囡嘅父親，《父母恩》寓意深長，22歲時Roy從事跟車送貨，一次交通意外，令佢身體嚴重受傷，同時失去左手，面對殘障令Roy對所有事失去興趣︰「哀傷期乜嘢事都冇興趣，簡單到扭毛巾都做唔到，4、5年都搵唔到嘢做。」有幾趟見工，老闆反問「點解唔請一個健全人士，要請你」，Roy話︰「真係唔識答。」今日Roy走出陰霾，不單止積極面對人生，仲用生命影響生命。

JB負責今次同Roy互動，出發前問到假如同樣事發生喺佢身上會如何面對︰「有啲難想像，都唔知點應付。」Roy帶JB去到工作嘅地方傷健協會傷健學院，跟Roy嘅上司Ivan見面，Ivan見證Roy嘅改變︰「最明顯佢肯著短袖衫，以前就算40多度都係長袖，代表佢已經翻過一重山。」Ivan話Roy嘅故事係好嘅見證，將經歷同改變跟學員分享，感染力勝過千言萬語︰「用生命影響生命，變成一種生產力。好多時障礙來自內心，唔係身體。」

為咗體驗傷健人士生活，JB試過縛起左手打羽毛球、跳繩，最特別係去煮餸，原來Roy有道拿手小菜「蕃茄炒蛋」，特別為囡囡學煮︰「佢乜嘢餸都唔食，淨係食呢樣。」JB同Roy喺音樂上，經過多次磨合，節目尾聲合譜出一首鄧麗君名曲《月亮代表我的心》，為訪問劃上完美句號。

另外，J2與香港共融樂團前日喺中環大館舉行一場名為《共融弦樂The Hidden Gems》直播音樂會，出席嘉賓包括西九文化區管理局陳智思、電視廣播有限公司主席許濤、大容基金會創辦人陳惠仁、德和慈善基金創始董事伍步謙博士、伍尚敦、伍尚匡、陳和平、上海商業銀行副董事長郭錫志、J2總監盧思麟等。許濤致辭時表示《共融弦樂》中6位主人翁喺音樂路上，不屈不朽克服挑戰同困難，主席許濤表示︰「喺呢6個不一樣非凡故事，令我諗起一個道理，人生裏面嘅樂與悲，其實唔係靠人哋畀你嘅，係要靠自己雙手去努力、打拼，呢個先係真真正正嘅無悔今生。」

陳智思致辭時表示「共融樂團」自2018成立以來，目的係提供開放可持續發展同表演嘅平台，陳智思續說︰「希望透過J2ers千禧人嘅視覺互動，相信觀眾會對傷健人士日常生活，同傷健共融有更深體會。」佢又不忘感謝參與拍攝嘅Alan、Venus、JB，參與過程非常投入，睇完之後令人好感動，「你哋係做『真嘢』，唔係做宣傳。睇到你哋互動之間帶出正面訊息」。

直播開始《共融樂團》節目6位受訪成員及3位J2ers Alan、Venus同JB喺現場夾歌，先後合奏出容祖兒、鄭秀文同鄧麗君嘅名曲，吸引不少觀眾欣賞。