颱風摩羯襲港丨連詩雅出月即要獨自面對超強颱風 蔡卓妍盼摩羯可以溫柔啲

颱風摩羯襲港，據指今次摩羯嘅中心風力非常強，加上吹襲香港時唔會減弱，有機會成為今年嘅最強颱風，所以天文台呼籲市民做足準備。

蔡卓妍

講到颱風摩羯風力咁勁，難免會令人諗返起去年9月嘅颱風蘇拉，當時香港多個地區水浸，即使係藝人住嘅豪宅都難免變漏水，其中以阿Sa蔡卓妍 同 陳家樂與連詩雅Shiga 兩間屋最為嚴重，前者嘅鋁窗不斷滲水，而後者嘅情況更可以用水舞間嚟形容，啲雨水不斷喺窗邊湧入，變成一個小噴泉咁，家樂同Shiga當時都話搞到成晚冇得訓。
阿Sa屋企去年入水情況。

阿Sa就喺限時動態發出少女的祈禱：「希望今次個颱風可以溫柔啲～」
有咗去年嘅經驗，今次颱風摩羯襲港，大家都早早做足準備，阿Sa就喺限時動態發出少女的祈禱：「希望今次個颱風可以溫柔啲～」而上月誕下小公主陳星頤Camila嘅Shiga，亦趕得切喺摩羯襲港前坐完月，不過由於老公陳家樂喺馬來西亞拍緊戲，所以今次應該得Shiga同BB一齊面對颱風喇！
陳家樂同連詩雅屋企去年嘅入水情況。
連詩雅拍片分享出月心情。

講起坐完月，Shiga拍咗條片分享自己出月嘅心情，佢話到而家都唔敢相信自己生咗個女出嚟，又指做咗新手媽媽後，最大嘅感受就係覺得媽媽真係相當偉大：「尤其係餵全母乳嘅媽媽，直到自己親身體會過之後，就知道個辛苦嘅程度，係要靠意志同埋嗰份母愛先至可以撐落去。」Shiga又指而家自己嘅願望，就係想Camila可以健康咁成長，只要見到佢健康，就會好似放下心頭大石咁。
Shiga話最想Camila可以健康咁成長。