黎明一連兩場音樂會圓滿結束 欣宜貼滿暖包冒寒風唱跳high爆全場

黎明（Leon）聯乘時裝設計師VIVIENNE TAM同名品牌舉行兩場戶外車輛演唱會，噚晚於中環海濱活動空間演出尾場，兩場演出圓滿結束，噚晚天公造美，雖然天氣依然寒冷，但強風減少，呢次演唱會擔任嘉賓嘅黎明演出更為流暢，台下嘅fan陶醉於Leon嘅歌聲之中。

首場演出，汽車位貴價門票及座位區全場爆滿， 噚晚尾場都係座無虛席，現場早已泊滿名車，不少觀眾坐喺車上揮動着熒光棒，十分投入，Leon繼早前重新灌錄《夏日傾情》之後，佢特別為咗今次演出，重新灌錄經典歌曲《那有一天不想你》，歌曲以已弦樂伴奏，予人耳目一新嘅感覺。難得跟偶像近距離接觸，噚晚唔少粉絲向Leon送上禮物，Leon拿着歌迷送嘅公仔珍而重之，指公仔嘅眼鏡有啲彎，黎明指別人送畀佢嘅禮物，佢都唔捨得唔錫住，但係噚晚有歌迷送咗一個公仔畀佢，後來發現得一隻鞋，好彩呢日搵得番，歌迷立即報以掌聲。

首場Leon透露身上嘅皮褸係30年前拍攝電視劇《原振俠》時著過，更指呢件皮褸其實係佢拎錢訂造，大讚呢件皮褸質量好，呢次Leon歌單都係歌迷耳熟能詳，整晚幾乎不停大合唱，尤其係冧歌《夏日傾情》，台下觀眾早有準備，當鏡頭拍到時，立即跟身旁嘅伴侶咀嘴，全場充斥着甜蜜氣氛。Leon緊接再唱出《Good Luck》、《一生幸福》，台下粉絲聽得如痴如醉。

演唱《一生幸福》後，現場一片寧靜，歌迷準備大叫「Leon」時，Leon突有感而發:「好靜！你哋唔好講嘢，頭先有啲霧吹過，加上兩盞大光燈。我好似喺個海中間，完全見唔到任何人，好似一個人都冇咁。每次有好多不同嘅經歷，會喺自己腦海中記低，好彩今天冇落雨，要多謝個天，預祝下次見你哋唔使戴口罩。」觀眾歡呼認同！

是次演唱會破天荒結合時裝騷，著名設計師Vivienne Tam 會上展示最新一季嘅Collection 。Leon表示每次演出有不同回憶：「大家喺唔同地方見面，今次有fashion show，唔知將來有冇機會行catwalk呢，一定有嘅，來生啦。人哋喺台上嘅模特兒真係需要長時間訓練，冇人唔辛苦。最重要大家開開心心，過個開心嘅聖誕、新年。」Leon唱出最後一曲《Sugar in the Mamalade》，期間亦向觀眾報以祝福，希望大家聖誕，新年都快樂，更提早跟大家拜早年，祝大家恭喜發財，大吉大利。

王丹妮同鄭欣宜噚晚演出，王丹妮第二晚演唱信心加倍，演唱《Born this way》及《螢火蟲》兩首歌，欣宜唱《先哭為敬》自爆全身貼滿暖包做足準備。一曲《豐乳肥臀》喺寒風下瞓身又唱又跳， high爆全場。兩場演出順利完成，Leon與王丹妮、Vivienne Tam喺後台合照留念，Leon大讚王丹妮唱得出色，讚Vivienne多年來都保養得宜。而Leon契爺胡楓噚晚喺寒風下前來支持契仔，修哥做足準備著上厚厚大褸，喺台下睇得甚為投入。