「治癒系」女新人雲浩影首張專輯面世 冰山美人百變造型亮相

寰亞音樂「治癒系」女新人雲浩影（Cloud）首張個人專輯《THE CLOUD》噚日面世，並於晚上舉行新碟發佈會，廣邀傳媒及圈中前輩好友出席，親臨見證佢喺樂壇嘅第一章。新碟收錄冠軍歌《密切接觸者》以及三首今年派台作品，仲有一首英文歌作為彩蛋，送畀歌迷聖誕小驚喜。

Cloud正式出道七個月，推出四首派台歌，並擁有個人專輯，拍攝唱片封面及相集當日，以多個造型亮相，包括高貴優雅寶石Look、充滿節日氣氛嘅紅色「禮」服、帶點反叛感嘅短裙Look，以及冰山美人Look之外，仲有Cloud著藍色紗裙赤腳邊跳舞邊拍照，仙氣十足。Cloud心情興奮：「好開心，今日著咗好多靚衫，同埋邀請到好犀利嘅攝影師『MissBeann』合作，佢喺日本參與過好多大型企劃，而我第一次跟女攝影師合作，感覺好新鮮、有趣。」

而今次唱片名字，亦係攝影師神來之筆，Cloud表示：「最初都有諗過好似其他歌手推出同名唱片，但總覺得Cloud一個字，好似欠缺咗少少，結果MissBeann提議『THE CLOUD』，大家都好鍾意。」Cloud好多謝公司同團隊，由服裝造型、髮型、化妝及攝影師配合，令佢有機會試好多唔同嘅造型，帶出不同面向嘅Cloud，其中佢一身紅色打扮，又絲帶又蝴蝶結，似足一份聖誕禮物，充滿節日氣氛，Cloud解釋呢個設計冇特別配合聖誕節，不過唱片色調同造型都較鮮艷，佢希望快啲睇到完成品，希望大家都鍾意。

25歲Cloud一年後決定告別OL生活，加盟寰亞音樂，成為全職歌手，今年五月推出第一首派台歌《願望之翼》，其清新脫俗嘅歌聲令人印象深刻，之後推出輕快作品《到了那裏就對吧》，被喻為「治癒系」歌手，九月推出《密切接觸者》首度登上香港流行榜冠軍位置，為Cloud歌唱事業打下強心針，呢次全新歌曲《氣流》令佢嘗試新曲風，今年底，Cloud首次參演電影《深宵閃避球》上映，以及首次登上紅館舞台，擔任大師兄鄭伊健個唱固定表演嘉賓，讓更多人聽到佢嘅歌聲。