StarTalk丨曾比特盼邀女神級演員做MV女主角 感謝李玟喺節目內外嘅照顧

聖誕節係個開心甜蜜嘅節日，Sweet到就連本身唱開苦情歌嘅Mike曾比特，都要喺呢個日子推出返一首sweet啲嘅新歌《重見》！呢日Mike就到《StarTalk》同 許文軒 傾下自己首新歌，當然仲會講講之前去內地參加歌唱節目嘅經歷啦！

以前唱慘情歌多嘅Mike，拍MV好難可以有個靚女女主角做對手戲，雖然今次新歌難得可以sweet返下，但係MV入面Mike依舊冇緣同靚女演對手戲，佢都好無奈咁話， 雖然自己曾經許下承諾要每次MV都搵個女神級嚟做女主角，但今次呢個承諾依然兌現唔到呀。

去年參加咗好幾個大型嘅綜藝節目，仲要自己北上生活咗近9個月，Mike話呢次係人生第一次離開香港咁耐，過程中有好多不安，因為人生路不熟，就連畀錢都唔太識，搞到Mike成日都要搵人訴苦。佢話好多謝CoCo李玟嘅陪伴同幫助，因為參與節目嗰陣，Mike就成日都會搵對方談心傾偈減壓，慢慢仲同對方熟絡咗，有好多生活或者諗嗰通嘅事都會同CoCo傾。

參與完內地節目之後，Mike嘅人氣升，佢就話好感謝大家嘅關注，自己亦都覺得好驚訝，最開心係屋企人都睇到同肯定佢嘅演出呀。對於可以同林子祥、李玟合作，Mike話發夢都冇諗過可以同兒時嘅巨星同台，更加冇諗過可以同對方傾偈認識，Mike話當日見到阿Lam嗰陣，都有同對方講佢係自己嘅偶像，但就因為當時自己太緊張，講完之後唔敢望對方，所以到而家都唔知阿Lam當時聽完有咩反應。

Mike話喺唱歌方面阿Lam畀咗唔少意見佢，其中最有趣嘅一個意見，就係當日Mike唱完《初戀》落台之後，即刻走咗去問阿Lam自己唱成點？結果阿Lam同佢講：「你啲頭髮可以撥返高少少，因為你唱嗰陣我睇嗰到你對眼。」

而另外一個節目，Mike就認識到多位前輩，講起點樣可以快速同大家打開話題？Mike就話全靠自己個髮型呀！想知點解？Clike入去睇完整版訪問啦！