法證先鋒V大結局｜Bosco化小丑妝故事留伏筆？ Coco似笑非笑令人心寒

台慶劇《法證先鋒V》喺23號播出大結局，而當中劇情絕對係Big Boss Thena 蔣怡 飾同余Sir 黃宗澤 飾嘅對決。Thena落網後余Sir前往探監，佢哋喺長達5分鐘嘅探監戲中，除咗你來我往嘅精彩對白之外，蔣怡似笑非笑同魔性十足嘅眼神亦非常搶戲，獲觀眾大讚。

Coco受訪時就透露呢場戲最大難度係要對住鏡頭演出同唸對白喇：「因為我完全睇唔到鏡頭背後男主角係咩表情，所以只能靠想像去演。因為想Keep住連貫性唔想斷開，所以背台詞背咗好耐，背到瞓著咗，瞓完再繼續背，全日都喺度背台詞。」

至於全集最大迴響，亦係Coco氹掂Bosco閉眼一分鐘後，Bosco就由木訥變成一樣似笑非 笑，仲向Coco話：「係咪每個人都會成為你心目中嘅小丑？」之後鏡頭一轉就去到Bosco 精心化小丑妝場面，仲以陰險爆燈嘅笑容為全劇畫上句號。

唔少觀眾都猜測Bosco探完Coco監後化小丑妝，係「成魔」嘅徵兆，而當事人Bosco就大賣關子：「個小丑妝都係一個伏筆嚟，係咪真係會開《法證VI》呢？大家都唔知嘅，都係秉承番個小丑傳統啫。大家問我時，我都係叫大家估吓個結局咩意思。」

Bosco又話小丑妝化妝需時：「的確係花咗好多時間，因為係由零開始，一邊化一邊拍，化一啲又拍一啲咁，主要個底當然都由化妝師化， 我只係負責填色。」而講到拍攝搶救 王敏奕 戲份時既要人工呼吸、又要心肺復甦，Bosco就話因為同Venus太熟，所以拍攝時零尷尬：「當然拍之前都會禮貌上溝通吓，同做足安全措施嘅。

對於被指係「法證暖男」，仲經常送「Bosco牌保護Pad」以免對手受傷，Bosco就話係同自身經歷有關：「我自己拍動作戲受過好多傷，所以成日會自備一袋Pad，有時見到佢哋冇墊到保護Pad，我就會借畀佢哋用，拍戲最緊要大家唔好受傷。」 

喺劇中同Bosco有唔少粉紅泡泡嘅Venus，同型男前輩Bosco拍親熱戲會唔會有緊張同尷 尬時，佢就竟然好似有啲嫌「唔夠喉」喇：「冇太緊張，因為唔算太親密，哈哈！結局最難忘係貨櫃戲被Bosco營救嗰場，一來係佢第二次救我，二來拍攝時係Bosco生日。」佢仲自爆成日獲 Bosco特別對待：「佢的而且確係一個暖男，好照顧身邊所有人，鍾意請大家食嘢，不過我就成日畀佢整蠱。」