有種好男人丨李佳芯喊戲再受讚賞自爆拍攝時一度失手喊唔出

劇集《有種好男人》19號晚播出嘅一集，講到馬神馬德鐘去迎救被匪徒誤綁嘅吳偉豪，而為咗逃避追捕吳偉豪就要着全襪喺樹林度逃走。講起拍呢場戲，吳偉豪話好在劇組貼心咁幫佢準備咗鞋墊護腳，如果唔係佢都唔知可以點跑，仲話拍跑過程中襪都因為跑到穿晒窿而換幾對。
劇情講吳偉豪為逃生，着住襪喺樹林逃跑。
雖然要近乎赤腳跑山，但係吳偉豪就話自己唔係最辛苦嘅一個，反而係要孭住佢跑嘅馬神仲辛苦，吳偉豪仲透露拍攝期間馬親身上陣拍攝一幕跳落山坡戲時，雖然遭石頭刮損手，但對方仍堅持完成晒拍攝先處理傷口，令吳偉豪大讚馬神專業之外，亦心痛對方受傷：「我都有啲心痛，因為我見到傷口入面仲有啲石粒。」
吳偉豪讚馬神相當專業。
另外19號晚一集，Ali李佳芯嘅多場唔同層次嘅喊戲亦被受讚賞，事後Ali受訪嗰陣，就話因為自己好少喺人前喊，所以佢都有啲擔心喊戲效果，Ali仲自爆拍攝醫院場喊戲時，曾經一度喊唔出:「有時因為瞓得少、休息唔夠，情緒就更難收放自如，我記得今次醫院嘅戲我有試過喊唔出，但導演同工作人員好好，見我未 Ready 就調配場口就我，好多謝佢哋。因為冇得逼啲眼淚出嚟，我又唔想用眼藥水，因為想用真感情。」
Ali 喺劇中嘅喊戲備受讚賞。
《有種好男人》將會喺今晚 20號 20:30播出大結局，而劇中兩大女神 Ali 同Yoyo陳自瑤將進行終極對決，前者以仙氣喱士白色長裙 Look 登場，迎戰後者展現完美身段的雪白婚紗Look，期待指數爆燈，萬勿錯過。