由泰國旅遊達人胡慧冲主持嘅《冲遊泰國》逢周一至周五晚十點半J2(82台)播放。沿用上季班底,有大家喜愛嘅「叉燒姐」鄺玲玲同「冬蔭家族」嘅「冬蔭妹」、「冬蔭妹妹」、「冬蔭哥哥」,仲有好似大碼版嘅胡慧冲。
今晚(9日)胡慧冲同「叉燒姐」去曼谷市郊The Siam Hotel,特點在於酒店主人係電影發燒友,入面陳設猶如電影博物館。吸引「叉燒姐」仲有酒店pool villa,賣點有露天客廳同泳池,樓底特高同埋超靚嘅浴室,盛惠50,000銖(約11,600港元)一晚。
酒店另一特點係可以代約刺符師到會,紋上佛經、符咒或者圖騰,既可辟邪又可以祈福保平安,據知係全泰國唯一一間有類似服務嘅酒店。之後胡慧冲同「叉燒姐」來到Everyday Moo Krata餐廳,地下係酒吧加咖啡店,樓下打完卡可以去樓上歎泰式烤烘火鍋(mookata),配上靚靚河景冇得輸。
明晚(10日)胡慧冲同「冬蔭哥哥」去到街市改裝嘅曼谷吞武里市場(Thonburi Market Place),有遊日本築地市場嘅感覺,吃喝玩樂應有盡有。由街市轉營而成,海鮮即叫即煮,價錢豐儉由人,一盤三文魚刺身船收費700銖(約163港元)、泰國蘇梅產嘅生蠔,6隻收費600銖(約140港元)。
胡慧冲話唔太喜歡食海鮮嘅觀眾,可以幫襯熟食攤檔,有地道泰式美食,佢特別推介魚蛋粉,一碗有齊9款配料,飲飽食醉,到市場按摩店鬆一下,一小時收費260銖(約60港元)抵到爛,之後到隔離飛埋髮。節目尾段「叉燒姐」出場同胡慧冲去蒲,由外表睇唔知道係咩類型嘅店舖,但「當舖」招牌字加上麻雀等賭具,究竟內裏有咩乾坤,留意明晚《冲遊泰國》!
另外,今晚11點觀眾可以同「叉燒姐」、胡慧冲互動,佢哋喺IG嘅J2 channel 開live,由Jojo黃紫恩擔任主持,千祈唔好錯過。
《冲遊泰國》周一至周五晚10點半 J2 (82台)播放