超級毛特兒大賽｜16入圍毛特兒分別登場 22號正式展開選美盛事

J2 除咗推出大量唔同形式旅遊節目滿足觀眾之外，5月22號又會推出本年度首個大型自家製重頭節目《超級毛特兒大賽》，為觀眾炮製香港電視史上首個選美真「狗」騷，打造狗狗版《超級模特兒新秀大賽》。

製作組早喺年年初已舉行大型招募活動，吸引逾600組主人帶同愛寵報名參賽，最終製作組挑選出16組成為節目參賽者。而由3號開始，16組參賽者官方照喺 J2 官方網站曝光，令人驚艷 嘅係，唔只16組狗狗嘅品種完全唔同，就連飼主都係來自各行各業，當中更不乏型男索女，令節目期待同可觀性大大提高。

16位「佳麗」品種，包括有近年備受熱捧、被指擁有「天生狗界Model」骨骼嘅意大利靈緹(又稱格力犬)、法國鬥牛㹴、拉布拉多、唐犬、混種犬、摩天使、哥基、北京犬、貴婦、金毛尋回犬、松鼠、比熊、鬆獅、柴犬、臘腸犬同芝娃娃，唔少都係香港愛狗之人嘅熱捧品種。

雖說節目主題係選最Bling Bling同最優秀嘅「毛特兒」，不過唔不代表競選品種「非富則貴」，除咗包括混種犬同唐犬之外，今次參選年齡亦係不設上限，參賽狗狗中，其中仲有已年屆 16歲長者之齡，足證《毛特兒》係非一 般選「美」節目，到底16歲老友記咩原因入圍，就要留意後續宣傳喇。

除了狗隻品種包羅萬有之外，狗主Profile亦非常吸引，唔少狗主自身已擁有直逼模特兒級數顏值，包括本身真係Freelance模特兒嘅Sharon、「空姐明禎」Miho同「碩士超蓮」超慈；除咗顏值外，16位狗主嘅職業同個性都各有吸引之處，除咗專業人士代表、 偏門職業代表、同愛犬「神撞樣」代表，仲有綜藝魂附身代表，當中以有「詼諧版張學友」之稱嘅狗主阿偉最為突出，面試被要求獻唱張學友經典金曲嘅佢，以奇招成功令一眾評審眼前一亮，到底阿偉用咩招數突圍，記得繼續留意住相關報道喇。