天龍八部｜《好聲音》成員演繹俠氣經典 港人熟悉演員參演新版本

古裝劇《天龍八部》將接棒《一舞傾城》，喺6月14號起推出。 新版本《天龍八部》中有唔少港人熟悉面孔，好似台灣型男 楊祐寧 文詠珊 呂良偉 同 劉玉翠 等參與演出。飾演豪氣喬峰嘅楊祐寧，獲導演于榮光大讚天生擁有武俠氣質；至於Janice Man飾演嘅「神仙姐姐」王語嫣就被指「自帶仙氣」，令人期待。而曾於1997版《天龍八部》中飾演阿紫嘅劉玉翠，相隔廿多年後今次「升呢」飾演阿紫親母阮星竹，呂良偉就飾演汪劍通。

為打造貼近香港觀眾口味嘅武俠情懷，TVB為新版《天龍八部》重新剪接同配音之外，又邀請《中年好聲音》兩對最佳拍檔 龍婷  丁文俊 仲有 李佳 羅啟豪 ，分別重新演繹經典主題曲《萬水千山縱橫》同片尾曲《倆忘煙水裡》。

兩首新版歌曲嘅MV日前播出，龍婷同丁文俊以黑Tone造型上陣襯到絕，化身搖滾CP獻唱搖滾版《萬水千山縱橫》。佢哋早前接受我哋訪問時，龍婷就笑言：「我哋之前唱開情歌，今次我哋就唱劈友歌！」龍婷仲話自己比較鍾意唱情歌：「冧得嚟但唔好太苦情，因為可以日日聽住唔會厭。」而丁文俊就話希望將來有機會拍劇： 「由細到大都睇開TVB，幻想自己可以拍武俠片。」身邊嘅龍婷仲笑佢話適合演搞笑角色多啲呀。

至於李佳同羅啟豪獻唱嘅柔情版《倆忘煙水裡》，同樣以All Black造型上陣，一唱一和非常合拍。錄音期間因啟豪身在外地，所以要分開錄音，拍攝MV時李佳仲笑言真係要靠幻想。

比賽期間曾經合作過嘅佢哋，笑言希望擁有屬於兩人的合唱歌，李佳話：「希望係情歌為主，我哋比較啱唱悲情歌。」至於有英國豪花名嘅羅啟豪，就已正式由英國返香港發展歌唱事業喇。

《中年好聲音》參賽者一步一步實踐音樂夢，由成功入屋吸納歌迷、到登上紅館舞台、又獻唱劇集歌曲同拍攝 MV，熱血追夢過程相當勵志。而《中年好聲音 2》將喺6月11號舉行首輪海選，無綫娛樂新聞台會喺社交平台全天候直播，聽日記得黐實我哋喇。

中年好聲音2報名連結 https://tvb.app.do/midlifesingandshine2

《天龍八部》6月14號起星期一至五晚 21:30 翡翠台