中年好聲音2丨逾五千人海選試音實況 多位實力唱將爭取躋身100強

歌唱選秀真人騷《中年好聲音》第一季大獲好評，早前第二季《中年好聲音2》進行三輪海選及全球招募，報名人數更超過 5,000 人。而由 許文軒 主持嘅海選試音情況，已剪輯成《中年好聲音 2 100強大召集》，將於16嘅晚播出。
今季海選出現唔少實力唱將，當中 42 歲嘅顏金達大獲正評，深情獻唱《你是我的眼》嘅佢，獲伍仲衡大讚有「穿透力」，而周國豐指：「相信你係其中一個會被睇好嘅參賽者。」46歲嘅麥素華 Rock 爆獻唱《I Hate Myself For Loving You》亦贏得好評，素華有六名子女，最大嘅29歲，最細嘅一位都19歲，佢話仔女們都好支持自己參賽。至於曾參加新秀、而家35歲係全職媽媽嘅趙芮嵐，已經有三位仔仔嘅佢保養得宜，而且相當唱得。

今季參賽者同上季一樣，有唔少都係「生命鬥士」。51歲嘅陳寶雄喺三年前因為糖尿上眼，導而家右眼視力幾近係零，而左眼嘅情況亦開始變差。熱愛創作嘅寶雄曾經為劇集《天地豪情》主題曲《說天說地說空虛》作曲填詞，佢話今次參賽只為圓夢：「最大夢想係希望再寫到 TVB 劇集主題曲，而且可以自己唱番。」

另外仲有啲參賽者嘅聲線同明星相似，當中以旗袍上陣嘅鍾維，唱出自選歌《但願人長久》時，版張佳添大讚聲線有少少鄧麗君嘅影子。而喺參賽者中亦有唔少熟悉面孔，包括有份演《一舞傾城》嘅顏仟汶、第一屆《超級巨聲》嘅劉威煌、90年代歌手鄭梓浩、2003年港姐季軍戚黛黛、前 E-kids 成員林詠倫、童星出身嘅「光頭仔」王嘉明、許志安哥哥許志偉、呂良偉弟弟呂良國、 鄧兆尊弟弟鄧兆榮同孫耀威妹妹孫美賢等。節目中還有很多臥虎藏龍嘅「好聲音」輪住登場，亦有唔少參賽者專誠來港參賽，包括內蒙古、湖南、瑞士、美 國、馬來西亞、台灣、新加坡等地。


《中年好聲音 2 100 強大召集》星期日 22:00 翡翠台