雲浩影新歌為靚狂撻十幾次 首參與創作放下回憶過往

 雲浩影 最近初嚐作曲人滋味，同幾位前輩合作創作新歌《放下放不下》，MV中嘅Cloud漫遊穿梭夢境，調節心態面對放唔低嘅人同事，接納過往成為美好回憶。

Cloud日前為新歌拍攝MV，仲為效果狂扑落床十幾次

新歌《放下放不下》包括前輩Alex Fung(馮翰銘)、TonYNot同朱琳，加上藍奕邦填詞，Cloud話：「好開心同大家合作，寫咗呢首咁澎湃、咁感動嘅歌。歌詞係講，有啲人陪我哋走過青春，久唔久會諗起佢，想知佢過得好唔好？啲人成都話要『放低』，但我自己覺得『放唔低』都唔緊要嘅，所以就有呢首歌《放下放不下》。好多謝阿邦寫咗份咁好嘅詞畀我，佢好畀心機考慮埋我唱嘅時候會點樣唱，有啲用字方便我去唱，整個錄音過程好舒服。」

新歌亦係Cloud首次嘗試參與創作，令佢更加期待

MV當中Cloud其中一場要飛撲到床上，然後工作人員再向佢她身上拋出幾張毛氈，Cloud為拍攝效果來回飛撲足足十幾次導演先收貨。事後Cloud笑爆話：「真係撻咗好多次呀！因為要夾埋工作人員嘅動作，我又想畫面唯美啲，保持個樣靚，希望跌落床一刻感覺溫柔啲，但其實係撻落去！」

夢境中Cloud回憶當年嘅愛人，希望大家學會放下心中遺憾

Cloud仲喺MV穿梭睡床、課室、醫院等場景，佢話：「MV講我夢中返去回憶，有一個男生陪我走過青春，縱容或者係容忍咗我嘅任性、教識我成長、學習去愛人。可惜長大之後，我愛嘅人唔再係佢。當中一場醫院景，寓意我係一個愛情病人，對愛情好執著，放唔低。呢首歌就係講一係就由得佢，一係就完全放下。希望自己某程度由佢放唔低，唔使咁執著一定要『放下』，因為都係美好回憶，陪伴大家走過青春。」