新城勁爆2023｜Gigi與兩老師齊封女歌手 姚焯菲掃走兩獎大感滿意

12月30號晚樂壇第一張成績表出爐，喺《新城勁爆頒獎典禮2023》上，一眾聲夢畢業生成績大豐收。出道短短兩年幾嘅炎明熹除咗憑《Little Magic》捧走勁爆金曲獎之外，更以凌厲走勢首奪勁爆女歌手獎，同昔日導師李幸倪（Gin Lee）、泳兒平起平坐。

獲獎嘅Gigi得到大批Gi炎粉到來支持，仲即場高呼：「我愛你！」令Gigi開心又感動，佢好謙虛話；「自己真係好幸運先可以同兩位前輩一齊攞到獎項，唔好作為比較，唔知會唔會有啲朋友會諗咗另一方面，我會繼續加油，亦好多謝今日嚟支持我嘅粉絲。」Gigi仲發揮佢嘅外聲語令fans哈哈大笑。

得到勁爆躍進歌手及憑《這個姿態》得到勁爆新媒體歌曲嘅姚焯菲（Chantel），同樣有大批「小飛象」支持，Chantel對今年樂壇成績滿意，佢話冇諗過自己會獲得兩個獎項，對佢來講係好大鼓勵，未來會嘗試更多不同曲風。獲封人氣偶像嘅 鍾柔美 當晚因為感冒未癒，帶病上陣演出，佢希望冇令大家失望。而同樣得到勁爆躍進歌手嘅張馳豪覺得獎項對佢而言係一個肯定，來年會計劃推出動感歌曲，有望更大發揮。

至於詹天文（Windy）同林智樂（Felix）則雙雙捧走勁爆新人獎，Windy得獎後表示好夢幻，有種不可思議感覺，十足十發夢一樣，非常多謝fans投佢一票。而Felix就話冇諗過自己會得獎，所以喺攞獎讀感言時超級緊張。

五人組隊出道嘅XiX亦係頒獎禮上得到勁爆躍進組合，獲得樂壇首個獎項佢哋都好興奮，特別想多謝恩師Eric Kwok（郭偉亮），坦言冇Eric Sir就唔會有機會企喺頒獎台，同時感激曾經幫忙嘅人。