三小花尾場強忍淚水感謝粉絲無私支持

聲夢三小花兩場演唱會圓滿結束，眾fans見證住姚焯菲Chantel 鍾柔美Yumi 同詹天文Windy嘅成長，成個演唱會上三位少女大部份時間都係以唱跳為主，從K-pop洗腦神曲唱到經典廣東快歌，完全難佢哋唔到呀！

除咗唱跳外，佢哋仲喺演唱會上展現自己嘅樂器才能，Chantel彈琴、Yumi吹Saxophone，而Windy就表演長笛，當然仲有佢哋嘅各自solo環節啦。

Yumi、Windy同Chantel嘅兩場演唱會圓滿結束

騷後接受訪問時，Chantel就話喺台上見到台下嘅燈牌多過首日，令佢覺得相當感慨，同時好感謝fans嚟支持，喺台上見到呢個畫面令佢有毛管戙嘅感覺。對於結尾時喺台上強忍淚水，Chantel就話自己當時見到Yumi同Windy一望住自己時，就爭啲忍唔住，Yumi亦話自己望到兩位隊友時都好感觸。

佢哋仲因為歌迷嘅應援而非常感動Yumi鍾柔美Chantel姚焯菲Windy詹天文

而hold唔住流咗兩滴淚嘅Windy，除咗擔心整花個妝外，佢仲話喺台上嘅心情可以話係百感交雜，因為當佢見到大家揮動手機燈時，令佢諗返起聲夢比賽，同埋第一次喺麥花臣開演唱會嘅時光，Windy仲話當下感受到自己嘅成長同蛻變，亦好多謝大家一直以嚟嘅支持。