郭富城個唱尾場賣力演出 獲兩千金捱眼瞓支持感冧爆

郭富城 13場紅館演唱會圓滿結束，呢晚尾場，黎燕珊、朱凱婷、胡楓、張可頤、楊茜堯、羅子溢、關寶慧、李蕙敏同甄楚倩等都有捧場，顏米羔仲擔任大會攝影，但全場焦點就集中晒喺天王嫂方媛身上，佢帶住兩位千金嚟支持城城，即時引起小混亂。

郭富城嘅13場紅館騷圓滿結束
舞台王者城城一如以往賣力跳唱，亦唱咗一系列嘅經典歌曲，好似《狂野之城》、《錯愛的呼喚》、《無忌》同《一變傾城》等等。
城城騷舞技之餘亦大方展露辛苦操練嘅肌肉

完成咗13場演唱會，城城直認唔夠喉，訪問時都忍唔住起舞，城城話兩個女都睇得好開心，大寶雖然已經開學，但係為咗支持爸爸，夜瞓早起都唔緊要，搞到城城冧爆。又話阿女睇咗四、五場，連rundown都背得滾瓜爛熟，嚟緊12月將會喺台北小巨蛋開show嘅城城，就話到時都會帶埋囡囡去欣賞佢演出。
太太方媛再帶兩囡現場支持

城城喺舞台上大派福利，大show腹肌，睇到台下嘩嘩聲，不過，城城就大爆太太擔心佢冷親多啲，認真搞笑。講到呢次演唱會，佢最鍾意邊個環節? 城城就話係迷你畫室嗰part，佢好開心可以同粉絲分享自己嘅興趣，亦係一次大膽嘅嘗試。問到佢對自己今次嘅髮型點睇？城城就話自己特別鍾情窗簾髮型，因為佢覺得好特別，仲有一種卡通人物嘅感覺，所以無論外界對呢個髮型有咩聲音，佢都堅持要用。