蔡一傑開腦手術後現身哥哥登六生日會 蔡一智細仔日漸長大情如兩兄弟

蔡一智（Calvin）今年1月3日踏入60歲，喺圈中人緣極佳嘅佢慶祝活動陸續有嚟，除咗朋友之外，向來重視家庭嘅阿智生日又點少得同家人度過，從阿智上載一段影片所見，生日party有阿智、老婆周雪芳同細仔First Choy，仲有弟弟蔡一傑，及一班親友共聚賀壽，阿智嘅12歲囝囝日漸長大，同爸爸攬頭攬頸情如兩兄弟，而阿女估計喺外國留學未能一齊慶祝。

蔡一智今年1月3日踏入60歲，弟弟蔡一傑及一班親友共聚為佢賀壽。
阿傑去年10月驚爆生腦瘤及做手術切除嘅消息後，一直處於休養狀態，未有公開現身，早前阿傑就現身胡楓嘅聖誕派對上，見佢開心同朋友交流，相中嘅阿傑精神不俗。相反今次同阿智慶祝時被捕捉到嘅畫面則顯得神情肅穆，頭戴畫家帽嘅阿傑依然搶鏡，悉心打扮現身，不過點都好，只要能夠一家人慶祝相聚就是幸福！

阿傑今次同阿智慶祝時被捕捉到嘅畫面則顯得神情肅穆。頭戴畫家帽嘅阿傑依然搶鏡，悉心打扮現身。
其實阿智早前先後有不同慶祝活動，月初豪搞咗個生日派對，當晚圈中好友張智霖Chilam、袁詠儀Anita、古天樂Louis、古巨基、容祖兒Joey、蔡卓妍Sa等都有到場星光熠熠，當晚就未見阿傑嘅身影。另外熱愛運動嘅阿智之前亦同周潤發及大班志同道合跑友慶祝，連日被溫馨嘅愛包圍。

阿智嘅12歲囝囝日漸長大，同爸爸攬頭攬頸情如兩兄弟。