多圖丨群星恭賀蔡一智登六 周潤發拍片唱歌賀壽

生日快樂！1月3號係蔡一智嘅60歲生日，為慶祝「登六」呢件大事，日前阿智就舉辦咗一個盛大嘅生日party，當日古天樂、容祖兒、蔡卓妍、關智斌、古巨基、蘇志威、張智霖、袁詠儀、周汶錡、何秉舜、黃佩霞等均有到場祝賀，不過就未見細佬蔡一傑嘅身影。另外，發哥周潤發日前亦約埋成班跑友，為阿智送上生日驚喜。
多位圈中人出席阿智60大壽。容祖兒同阿Sa一齊出席。
生日會上阿智難免要開金口唱兩首歌，當唱到草蜢嘅經典歌《我們》時，就由關心妍老公楊長智暫替住蔡一傑，與蘇志威一齊同阿智合唱。
蘇志威都有出席。關心妍老公楊長智暫替住蔡一傑唱《我們》。
有份出席生日party嘅阿Sa，喺5號PO出多張當日生日會嘅相片，並寫長文講自己同阿智之間嘅緣份：「同阿智嘅緣份係我六歲嘅時候 😝嗰陣時我老竇正職係一個設計師，副業就幫一間娛樂公司負責香港歌手海外登台。我第一次見到明星就係草蜢同彭羚，因為太細個所以好多片段都唔記得喇。」
黃佩霞、蔡卓妍、容祖兒。阿智個cute版蛋糕好得意。張智霖同袁詠儀都有出席。
阿Sa稱當佢再見到阿智時，自己已經係Twins嘅成員，當時公司打算為出道唔夠一年嘅佢哋開演唱會，由於佢哋唔夠歌嘅關係，所以公司就打算搵啲勁嘅前輩歌手為佢哋撐場，而其中一個單位就係草蜢。阿Sa指當時覺得阿智已經唔記得自己，點知喺Rehearsal時，阿智一見到Sa媽就即刻同佢打招呼：「嘩！過咁耐佢都仲記得，我媽咪即刻冧咗 😍」
阿智 2025年第一跑！發哥同一齊跑友為阿智唱生日歌。
平日阿智鍾意跑步健身，佢仲會join埋發哥等跑友一齊號，而喺2025年嘅第一跑兼生日跑，阿智就當然同埋發哥等跑友一齊跑啦！阿智喺4號就PO出發哥揸機嘅自拍片，原來佢哋當日跑完15k後，就一齊為阿智慶祝生日，發哥更拍低同大家一齊唱出中、英文版生日歌嘅畫面，相當有愛呀！
發哥揸機自拍是常識吧。阿智話多謝發哥嘅驚喜安排。