伍仲衡結婚丨相識滿天下大批圈中人到賀 新郎伍Sir：等呢日50年

伍仲衡（伍Sir）今晚喺香港嘉里酒店擺酒，分享新婚喜悅，伍Sir指老婆Ida致詞有啲緊張，佢承諾努力造人，更指期待呢一日足足50年，終於遇到一個想娶嘅人，一對新人於近晚上8點步出見傳媒。

曾志偉、薛家燕、炎明熹（Gigi）、姚焯菲（Chantel）、鍾柔美（Yumi）、顏志恒、陳曉東、鄭俊弘、何雁詩、肥媽、黑妹李麗霞、蕭正楠、周吉佩及吳大強等陸續到賀，家燕姐、肥媽同黑妹就祝一對新人早生貴子，而陳曉東專程返港道賀，更細數與伍Sir相識淵源。

炎明熹同Yumi前來祝賀，炎明熹笑指伍Sir份人好幽默，尤其伍Sir講普通話好搞笑，Yumi見到一對新人咁sweet好戥伍Sir開心，周吉佩同顏志恒則大爆伍Sir怕老婆。

一眾兄弟團受訪時表示好開心見到伍Sir搵到真愛，見證伍Sir覓得幸福，祝福新人幸福美滿，布志綸同劉威煌笑言伍Sir係浪子，直到而家都唔係好相信佢會結婚，坤哥認識Ida多年，見到有一個人照顧到Ida，衷心送上祝福，劉威煌又指一對新人不斷曬甜蜜恩愛，笑指佢哋可以內斂啲。