杜平設宴與好友相聚 笑指胡楓 羅蘭心有靈犀一點通

移居澳洲多年嘅《歡樂今宵》前主持 杜平 ，疫情後首次返嚟香港，呢晚佢就設宴同一班圈中好友相聚，出席嘅賓客有 薛家燕 胡楓 羅蘭 蔡和平 安德尊 鄧英敏 森森 斑斑 廖安麗 三姐蕭秀香 等等，難得見到咁多好朋友，杜平都覺得好開心，佢仲話希望疫情快啲消失，等佢可以成日返香港見大家呀。

呢晚唔少賓客相識超過半個世紀，杜平都好珍惜大家嘅友情，尤其係當年同佢並肩作戰主持《歡樂今宵》嘅拍檔，講返起昔日嘅點滴，大家啲回憶都返晒嚟呀。而杜平仲諗起，蔡和平當年第一日返工就狂講英文，大家溝通唔到更引起唔少拗撬，不過估唔到大家嘅友情反而有增無減，仲一直維繫到今時今日。

杜平呢次返港不時都相約修哥食飯傾偈，兩人真係非常老友，怪唔之佢夠膽攞修哥同羅蘭姐嘅緋聞嚟講笑啦，杜平仲話有留意佢哋喺《妳不是她》入面嘅一段黃昏戀，又話佢哋係心有靈犀一點通，呢個時候修哥就似乎想轉移視線帶大家遊花園，仲反問杜平咩叫心有靈犀 ?

杜平又擒頂修哥之所以咁風趣咁多嘢講，都係因為羅蘭姐喺身邊呀，兩人對話咁搞笑，令家燕姐都笑唔停口呀。