Gin Lee親力親為開發程式 官方歌迷會App正式上架

李幸倪（Gin Lee）去年9月開始籌備官方歌迷會「GLFC」App，花咗近4個月時間終於有成果，日前佢喺IG live宣佈「GLFC」App正式上架，屬於少有以App成立歌迷會嘅香港歌手，既新穎又方便。Gin Lee坦言：「開發呢個app係希望有一個屬於自己同fans嘅平台，凝聚大家力量，令互相可以更多了解，嚟緊會舉辦唔同活動，多啲見吓佢哋，拉近距離，最重要係多謝佢哋扶持咗我咁多年。」

向來鍾意親力親為嘅Gin Lee有一齊設計會tee設計。

Gin Lee同團隊今次話得係超額完成任務：「其實開發一個App至少要半年至一年時間將佢完善，但今次用咗好快時間做好，終於見得人啦！」向來鍾意親力親為嘅Gin Lee為咗建立呢個平台花咗好大心力，除咗I.T.部份，訂貨入貨、會tee設計、翻譯、proof reading等，Gin都落手落腳去做：「用咗好多精力同時間，真係好似一日返幾份工咁，又要去跟進，總之好誇張，每一隻字我都要睇過，幫手翻譯，好多好多想像唔到嘅嘢，希望大家感受到我嘅誠意。」Gin Lee笑言過去一個月，自己家裏好像貨倉一樣，放滿晒大家嘅會tee、Merchandise（商品）、筆記簿等，而早前推出嘅利是封已賣得七七八八，稍後會將自己其他設計、喜歡嘅東西同大家分享，只會限量推出。

Gin Lee笑言過去一個月，自己家裏好像貨倉一樣，放滿晒大家嘅會tee。

好多Fans關心Gin Lee幾時會再開騷，佢大賣關子話嚟緊會與唔同人合作開騷，仲話遲啲大家就會知道有咩人一齊，而個人音樂會就喺下半年實行。農曆年將至，孝順女Gin Lee近年喺馬來西亞接咗家人來港定居，今年同屋企人一齊過新年，不過努力為事業打拼嘅佢就話今年大年初一要開工錄音，笑言真係打破自己紀碌，係一個好大犧牲，新歌將會喺農曆年後推出。
李幸倪去年9月開始籌備官方歌迷會「GLFC」App，花咗近4個月時間終於有成果。