肥媽李鼎打大佬｜肥媽自爆瞓棺材衰足三年 游嘉欣最後一集激爆鼎爺

《肥媽李鼎打大佬》話咁快就嚟到最後一集，最終篇就以「新春傳統禁忌揭秘」作為主題，肥媽同李家鼎配合主題炮製咗四道賀年菜。

《肥媽李鼎打大佬》嚟到最後一集。

農曆新年有唔少傳統習俗，講到年廿八洗邋遢時，鼎爺就特別講究：「碌柚葉、黃皮葉加埋豆腐煲水，因為豆腐有啲纖維，就算毛孔入面啲污糟嘢都會搓埋出嚟。」肥媽就分享一件唔能夠唔信邪嘅親身經歷：「有一年拍林正英嘅《一眉道人》，我拍完之後蒸糕，嗰年我真係唔發（意指啲糕發唔起），同埋我係瞓棺材底，結果真係衰足三年。」

肥媽講咩講到咁激動？仲激動到流眼淚？

肥媽又向娛圈新鮮人游嘉欣教路：「你第日如果拍呢啲片，第一要攞利是，第二係拜一拜先，真係唔係講笑！」之後肥媽再分享新年出埠到美國登台嘅趣事，佢話：「有一次去到美國移民局，佢話你好紅咩？點解請咗成廿年都係請你，仲叫我即場唱隻歌嚟聽吓。」肥媽話當時唱咗一首歌嚇到嗰個職員大嗌shut up，向來搞笑的嘅肥媽仲即場案件重演，究竟肥媽當時唱咗首咩歌呢？ 

睇嚟游游激到兩大長老好嬲喎。
游游笑言加入娛圈後好怕去親戚屋企拜年，佢話：「因為大家對娛樂圈比較好奇，例如會問某某明星個人係點，問好多八卦問題。」游游話喺網上學識可以用兩句話應對，分別係「關你咩事」同「關我咩事」，之後游游仲化身小天使演繹呢兩句說話，可愛指數爆標！嚟到最後一集，「問題少女」游游繼續講多錯多，激到鼎爺生蝦咁跳，鼎爺話：「梁醒波講過，呢啲叫搭棚竹，包頂包駁。」喺旁食花生嘅肥媽聽完笑到標眼水，場面搞笑。

《肥媽李鼎打大佬》今晚（23日）10:30翡翠台播映最後一集
賀年菜：花開富貴賀年菜：鮑你撈粗慶豐年。賀年菜：賀年溫公齋煲