吳慷仁打敗梁朝偉獲封影帝 自細受TVB及港產片啟發

一向出名好演技嘅金馬影帝吳慷仁，日前打敗梁朝偉等勁敵，勇奪香港電影評論學會大獎最佳男主角，呢日佢出席一個時裝活動，提到得獎心情，慷仁表現得好謙虛，仲話自己細細個已經睇好多TVB劇集同港產片，所以自己喺做戲方面受到好多演戲前輩嘅影響。

同場出席活動嘅仲有曾之喬同林哲熹，喬喬近期因為少咗喺社交平台同老公辰亦儒放閃，所以引來婚姻亮紅燈傳聞，喬喬澄清話因為自己過咗新婚甜蜜期，所以先會少咗放閃，不過佢就坦言因為疫情而不斷延期嘅婚禮，可能唔會補辦，因為已經冇咗嗰種衝動！

至於林哲熹就好甜蜜！事關佢啱啱向拍拖10年嘅經理人女友求婚成功，真係恭喜晒呀！