呂珊相隔近七年再開騷 與「阿仔」陳山聰合唱顯默契

呂珊 相隔近七年再喺香港舉行演唱會，好友米雪、關寶慧都有嚟捧場，呂珊更揾嚟識於微時嘅大師徐日勤擔任音樂總監，徐大師更將多首經典金曲重新編曲，好似《倚天屠龍記》、《萬水千山縱橫》、《誓要入刀山》等等，令觀眾有耳目一新嘅感覺啊。珊姐除咗請咗 龍貫天 擔任嘉賓之外，更請嚟視帝 陳山聰 一齊合唱《相愛很難》，而山聰更獨唱咗哥哥張國榮首《追》，山聰話珊姐之所以請佢做嘉賓，係因為佢哋喺新劇《奪命提示》入面演母子，所以阿媽開騷，阿仔當然二話不說要嚟撐場啦，山聰仲話佢哋兩個演出前其實無夾過，但台上表現就相當有默契呀。而隔咗咁耐再開騷，見番咁多嚟自世界各地嘅歌迷，珊姐都百般滋味在心頭呀。

  而山聰呢日亦有提及好友陳敏之早前喪母一事，山聰話知道呢個消息都好難過，亦有安慰敏之，佢話明白呢件事好難接受，但希望大家比啲空間敏之，亦希望敏之一切安好，早日走出喪母之痛。