梁靜茹1月飛勻英法澳紐開騷 克服時差巴黎演出圓心願

元旦喺杭州舉行跨年演唱會嘅 梁靜茹 一踏入2024年就已經先後到英、法、紐、澳舉行咗5場海外音樂會，短短一個月內就走勻南、北半球開騷，Fish就笑言：「我不是在唱歌的舞台上，就是在要去唱歌的飛機上。」

呢5場「情歌本格派」演出分別於倫敦、巴黎、墨爾本、悉尼同奧克蘭舉行。Fish由台北飛到倫敦，休息一日就喺溫布利體育館表演。相隔8年後再次踏上呢個舞台亦令佢非常感觸，而倫敦場一結束之後，佢就同大隊一早搭火車轉抵巴黎，一直希望可以喺巴黎舉辦音樂會嘅佢，此行亦終於圓夢。

梁靜茄今次巡迴演出，令佢一圓喺巴黎開騷嘅心願

雖然氣溫寒冷仲落雪，不過Fish亦抽空夜遊呢座浪漫都市，喺艾菲爾鐵塔同羅浮宮前瘋狂影相打卡：「享用法國的可頌麵包、踏著雪，手和腳都凍僵了，還是要到景點留戀拍照，喜歡用相機記錄自己看到的風景。」

巴黎演出之後佢就立即返到台北，把握僅得72小時休息時間同寶貝仔相聚，之後隨即啟程搭飛往南半球嘅澳洲，音樂會特別選擇以《寧夏》揭開序幕，熱情觀眾一開場就紛紛起身一齊舞動螢光棒，令Fish亦同樣熱情起嚟。

Fish短短一個月就走訪5個唔同城市開騷

今次巡迴Fish亦特別安排點歌環節，各場演出都表演咗多首歌單上未有安排嘅歌曲，其中喺奧克蘭站更清唱《夜夜夜夜》，仲獲全場觀眾一齊大合唱。飛足成個人嘅Fish呢場亦特別感動，忍唔住淚灑舞台嘅佢話：「這一個月不停地飛行、在不同城市演唱，每一首歌都顯得特別有感，在海外辦音樂會不容易，非常感謝團隊，每個人都克服自己的疲勞在時差中工作，非常辛苦，因為他們的付出，我才能到這麼多地方唱歌給大家聽，願我們都能繼續擁有愛的力量。」

佢將會稍事休息，3月再到唔同城市繼續巡迴

結束1月份「空姐」生活之後，Fish將稍作休息，而3月又會再展開澳門、新加坡、馬來西亞等地嘅演出。

圖片提供：天熹娛樂