中年好聲2丨譚輝智一曲感動肥媽落淚 安雅希臨時變陣棄跳唱

《中年好聲音2》嚟梗星期日（11號）晚年初二將會播出《陳慧嫻金曲賽 喜氣洋洋賀十二強！》下半場賽事，餘下六位選手將會陸續上陣，黑馬選手譚輝智越唱越輕鬆，佢事前嚴陣以待，揀選獻唱《歸來吧》，佢話當初聽女版都唔覺得難唱，當轉咗做男仔key原來係咁難唱，最難掌握係首歌嘅感覺，事前要將個情緒準備到好慘先唱到，所以未演出前，佢成日都唔同人傾偈，以免影響情緒。

身為評判嘅肥媽聽完之後都喊住話被譚輝智嘅歌聲感動到喊同毛管戙，因為佢唱出成首歌嘅含意。揀選陳慧嫻作品《夜機》出戰嘅大魔王安雅希，原本想為歌曲加入舞步，佢話事前仲搵咗老師教舞步，自認唔識跳舞嘅安雅希話要記得舞步係要不停練，原本上台時仲有信心跳一段，點知突然發覺得影響獻唱，所以臨時變陣唔跳舞。

另外，一位魔王劉可喺上半場賽事被指揀錯歌，同王玥、劉蒨葶跌入危險區，有機會被淘汰，劉可話又想做少少唔同嘅嘢，唔可以成日只做擅長嘅嘢。王玥覺得自己低音唔知係因為緊張，定其他原因表現得唔好，睇吓之後可唔可以練好啲。劉蒨葶就話自己可能因為想有唔同感覺畀評審同觀眾睇到，所以諗得太多而忽略原本首歌嘅編曲同意思，因而弄巧反拙，自己會好好檢討。