未婚妻涉假文書逾期居留還押 李龍基返港直奔懲教所探監

李龍基 自稱擁有外國驕人學歷同航空相關專業資格嘅內地未婚妻 王青霞(Chris) ，因為涉嫌逾期居留同使用虛假文書等，被當局控以6項罪名，星期二提堂被裁判官拒絕保釋，還押看管。

今晨李龍基乘搭高鐵由內地返港，現身高鐵站時神情嚴肅，招牌粉紅瀏海失蹤，簡短指出暫未能同Chris取得聯絡，又稱冇諗過事件會發展到如斯結果。佢又提到會為未婚妻購買日用品，之後隨即直奔Chris被還押嘅大欖女懲教所，看望目前被囚禁嘅Chris。

過往曾指會將名下多個物業過戶轉名，又指將會迎娶對方入門嘅基哥，獲唔少網友指今次事件後「甩身」，更有花生留言指「入境處勇救提款基」。不過未婚妻被捕時身處現場嘅佢，事後回覆傳媒查詢時就依舊稱相信女方，更落淚表白指將不離不棄。