炎明熹宣布演唱會重開兼加場 心水嘉賓多頭痕正式人選

炎明熹（Gigi）喺上年嘅兩場個唱尾場因為遇上打風而押後延期，近日Gigi喺社交平台宣布個唱將於四月重開，除咗補原定場次，仲會加開一場！Gigi得知補場日期落實後，心情相當興奮，對演唱會銷情就會以平常心面對。而Gigi率先預告喺四月嘅開騷歌單有可能同上年嘅唔太一樣！

Gigi上年開騷邀請「大Gigi」梁詠琪擔任嘉賓，大小Gi嘅同台帶畀歌迷好大驚喜。今次Gigi對嘉賓名單亦好有想法，佢自爆自己已有心水人選，但人選太多所以搞到好頭痕。佢仲笑言要邀請TVB娛樂新聞台主播許文軒獻唱！講到準備工夫方面，Gigi就希望把握時間可以練得更好，可以上多啲唱歌堂同要畀心機多啲練舞。

Gigi密密接Job收入亦有增無減，呢日佢喺一個理財活動時亦大談儲蓄心得，透露將將利是錢儲入儲蓄戶口，等有需要嘅時候再拎出嚟用。