莫文蔚驚訝《食神》火雞姐變流行經典 改口風想開演唱會

莫文蔚（Karen）呢日踩落廟街為一個推廣香港美食嘅活動宣傳，更有經典電影《食神》嘅場景醬爆瀨尿牛丸檔，令飾演火雞姐嘅Karen回憶番晒嚟。
莫文蔚踩落廟街為一個推廣香港美食嘅活動宣傳。

Karen回想拍攝嗰陣覺得好好玩：「冇諗過可以流傳咁多年，二十多年後年青觀眾繼續追捧。」對於內地節目不時請有代表性藝人還原經典角色，被問有冇機會再演火雞姐，Karen就斬釘截鐵話可能性不大：「經典係不能重複嘅，我不會太貪心。」Karen希望留返空間給後輩重現經典，佢有留意傅嘉莉之前喺劇集《香港人在北京》火雞姐嘅扮相。
莫文蔚當年演經典電影《食神》火雞姐。

Karen舊年專注籌辦個人藝術展後，農曆年喺英國小休兩星期叉電，唔知係咪休息夠有新諗法，早前講過唔再開大型演唱會嘅Karen改口風，話有意在港搞大型演唱會，但係希望找到適合嘅場地。咪睇Karen身形咁fit，佢話平最愛係港式燒味飯同煲仔飯，更有去一嚐坊間複製嘅黯然銷魂飯 ，不過佢話始終係當年原著版最好味。
傅嘉莉喺《香港人在北京》戴哨牙扮醜神還原莫文蔚「火雞姐」造型。