80歲葉振棠將首踏紅館開演唱會 夥米雪周吉佩李佳為慈善獻聲

殿堂級歌手葉振棠（棠哥）呢日出席慈善專輯發布會同宣布好消息，佢將於6月首次登上紅館開個人演唱會，適逢今年棠哥80歲大壽嘅日子，又成功申請紅館檔期，令佢格外開心，不過演唱會以告別為題，令一直愛戴佢嘅歌迷擔心棠哥唱埋呢個騷就退休。

棠哥解釋意思係佢第一個紅館個唱：「今年有能力做到，明年唔知做唔做到，或者會成為最後一個個唱，但其他群星及慈善搵我，我有能力都會出席。」

棠哥自小因病影響導致眼晴細胞受損，今次推出專輯不忘為眼科醫院籌款，佢親自聯絡圈中一班有心人為專輯獻聲，包括雷有輝、米雪、《中聲》周吉佩及李佳都有現身記招，同心協力為行善，見到前輩出心出力，大家一呼百應支持。米雪話棠哥今次挑選嘅歌曲，佔大部份係佢主演嘅劇，可惜佢只爭取獻唱一首，不過能夠與好友合作又可以做善事，相信大家同樣開心。