逆天奇案2丨梁小冰為挑戰而接下老角 為保造型神秘感而拒眾人集郵

相隔26年梁小冰再拍攝無綫劇集，佢喺《逆天奇案2》入面飾演李國麟嘅舊情人阿蘭，因為經歷種種不幸，而令佢嘅角色睇落比實際年齡大好多，40幾歲就已經滿頭白髮，同時亦滿面皺紋，比起現實中54歲嘅小冰睇落更老一截。
梁小冰喺《逆天奇案2》入面飾演李國麟嘅舊情人阿蘭。
小冰受訪時坦言自己答應演出嘅原因，係因為角色難度夠晒高，佢話：「唔經唔覺都主演咗50幾部作品，作為演員梗係想所有角色都演吓，呢個角色好有挑戰性，大家都會諗我會演CEO 高層呢啲角色，呢個角色無論遭遇同造型都夠晒估唔到。」小冰指今次拍攝最開心嘅係重遇多年老友：「監製、導演、攝影師同造型師全部起碼識咗30年，我覺得呢個團隊超晒班！」
 為角色小冰要化老妝。
由於要令角色顯老，所以小冰每次埋位前都要花半個鐘化老妝，小冰對化妝師能力讚不絕口：「化靚妝就要個半鐘，化醜妝只需半個鐘，因為化妝師好犀利，佢哋擺咗半打架生喺枱，一嚟就不停係咁噴，之後再逐條逐條將頭髮畫白，最緊要係夠大刀闊斧。」
小冰話今次角色好有挑戰性。
監製想喺劇集播出前盡量將小冰嘅「老妝」造型保密，故小冰為配合保密亦花咗唔少心力，佢笑言：「好似我化咗妝後有好多演員要求合照，我都要諗好多原因去拒絕，因為唔想曝光個妝，造型一曝咗光就會令到觀眾冇晒驚喜。」小冰又指今次拍劇有唔少難忘事，當中印象曼深刻嘅竟然係廟街嘅一棵樹！小冰話：「喺廟街嗰度拍攝，因為又要搬嘢又盛，係熱到由頭濕到落腳，同埋嗰度棵樹啲雀屎係不斷跌落嚟！」
 為保密角色造型，小冰拒絕晒拍檔嘅集郵邀請。
為咗今次角色，小冰刻意減磅，由體重最高峰132磅減到116磅，佢話：「其實我本身都想減肥嘅，點知家豪哥同志江打電話嚟邀請我，令我更加有動力去減。拍攝嗰陣我減到116磅左右，我依家就已經減到104磅，簡直係重生一樣！」小冰仲感嘆畀佢自帶嘅Baby Fat搞到「襟老唔襟瘦」，指自己就算瘦到成條藤咁，塊面都係肥肥哋，仲話要減到去參選時嘅93磅先會睇落去係瘦。

另外，今晚（17號）播出嘅一集，小冰將會同真．老公陳嘉輝有更多對手戲，當中嘉輝哥仲會捲入一單藏槍案添呀！

《逆天奇案2》逢星期一至五 20:30 翡翠台
現實中嘅小冰保養得宜。