神耆小子｜Kent哥演狼戾零食大王人見人怕 初哥Archie受全天候關愛超感恩

鄭則士 冼靖峰 蕭正楠  樊亦敏 曹永廉 傅嘉莉 羅毓儀 魯振順 吳子冲 同 袁潔儀 等主演； 王偉仁監製、林麗媚編審嘅新劇《神耆小子》 5月6號起首播。兩屆金像影帝鄭則士(Kent哥)白手興家，扮演零食集團「勁威威」CEO錢大海，由於硬淨成性，無論喺商場甚或屋企一樣「有佢講冇人講」。

Kent哥鄭則士扮演有佢講冇人講嘅「一言堂」零食大王

面對大海嘅高壓處事，兒子繼來(曹永廉 飾)、女兒有方( 傅嘉莉 飾)，仲有情人知己洪玫瑰( 樊亦敏 飾)表面言聽計從，實則各有各陽奉陰違，大海對三人亦存有極大疑心，經常以遺囑作為威脅三人籌碼。

就因為太過霸道而被家人主使綁架

一日大海上班途中突遭綁架，綁匪聲稱係受其家人指使，自此「查找綁架叛徒」風波一觸即發，偶爾路過綁架現場嘅趙一鳴( 冼靖峰 飾)喺「冇得揀」嘅情況下成為大海嘅私人偵探，又被威逼收留大海；豈料竟發現父親子勇( 蕭正楠 飾)同大海有陳年血海深仇。主角們錯綜複雜嘅關係、加上出乎意料嘅劇情發展，仲有充斥抵死鬥氣金句嘅場面，令《神耆小子》輕鬆惹笑之餘又不失懸疑。

好在遇到Archie冼靖峰解救

1974年已開始為TVB拍攝劇集嘅Kent 哥，演出過無數經典影視作品，當中最為人津津樂道嘅角色一定係「肥貓」，當年Kent哥亦因《肥貓正傳》而同《神耆小子》嘅監製王偉仁(Simon)結緣。

Simon今次為凸顯錢大海一角嘅霸道，專誠為Simon設計咗「老虎狗」形象，仲大讚相識近三十年嘅Kent哥易話為，亦係整部劇集嘅靈魂人物，Simon話：「只要Kent哥喺度，所有演員同台前幕後都會寧舍開心同埋專注。Kent哥有一樣嘢真係幾十年都咁專業，就係佢永遠唔會遲到、仲例必比通告時間早半小時到場準備，好值得欣賞。」

監製王偉仁早喺肥貓年代已同Kent哥合作，今次仲為佢設計老虎狗形象

演戲演足50年嘅Kent哥，今次主要對手竟係戲劇新丁Archie，雖然兩人經驗差距大，不過演出就一拍即合，連場同Kent哥嘅互拋場面，Archie唔止「戲勢」頂得住，就連有勁多IT專有名詞嘅對白亦一樣應付自如。

從影多年嘅Kent哥同初哥Archie有大量對手戲

Archie受訪時亦笑言全靠Kent哥貼身指教，又細數Kent哥3大暖心行徑，首先係教講對白加揣摩角色，然後係近乎24小時貼身指導同慰問，第三點則係樂於同後輩分享人生經驗：「由 Day 1去到最尾嗰日，Kent哥都係教緊我嘢，佢知我演戲經驗好少，佢唔單止教我講對白，仲教我點分析角色同揣摩角色對於故仔嘅功能。同Kent哥拍完每場戲，喺休息時間佢都會講解返場戲點解要咁做；每日拍完一齊食飯，佢又會講番我聽佢嘅相關經驗、同我點樣可以去更好咁裝備自己。」

Archie話今次受到Kent哥無微不至嘅指導同關心，非常多謝前輩
Archie仲話：「佢連Off Cam之後返到屋企，都會再Text我，教我邊場邊場可以注意啲乜，臨 尾仲一定加句：『希望你拍攝順利啦』。Ken 哥又會同我傾偈時教我好多人生道理，用佢嘅人生經驗教我點去看待自己嘅事業。拍完套劇我就去咗拍《亞洲超星團》，Ken 哥差唔多每兩、三日就同我講加油，問我咩狀況、有冇咩困難？呢啲前輩邊度搵？」

與鄭則士份外投緣嘅Archie，坦言對方同自己已過身嘅爺爺性格好相似：「都係佻皮得嚟又有威嚴，所以對住Kent哥，我係愈嚟愈唔怕佢，一開始都驚佢架。」

仲話拍攝完成後，Kent哥繼續關心《亞洲超星團》嘅進度，非常貼心為自己打氣
佢又非常感激樊亦敏(Amy)嘅提點：「我平時會睇多啲IT嘅嘢，呢個係Amy姐教我嘅，到我睇劇本時我就知個term講咩，就可以好有自信咁講到出嚟，咁角色嘅說服性會強好多。」除咗Archie之外，Kent哥同蕭正楠亦有大量「廝殺」場口，預告片就見到佢哋唔止經常口角，其中一幕蕭正楠仲會喪扯Kent哥底衫大玩對質互數，期待值爆燈。

蕭正楠同Kent哥有咩血海深仇而大打出手呢？

《神耆小子》 5月6號起 逢星期一至五晚 21:30 翡翠台