林保怡望《刑偵12》開電影版 點名讚3位TVB後輩引薦入影壇？

林保怡忙於拍攝劇集《刑偵12》，呢日現身一個頒獎禮獲頒最耀眼男演員獎，見佢受訪時戴上口罩，原來佢近日病倒，即將喺4號生日嘅林保怡都話要快啲病好，趕住出席唔同嘅生日飯局，近年熱愛簡約生活嘅林保怡透露生日唔會大排筵席，只會約幾個朋友食吓飯，至於生日願望就祝願劇集《刑偵12》成功。

林保怡獲頒最耀眼男演員獎。
林保怡更點名大讚同劇嘅後輩傅嘉莉、張振朗同陳自瑤相當努力。被問會否引薦張振朗入影壇，林保怡之前同劇集總監製鍾澍佳傾過《刑偵12》開拍電影版嘅計劃，如果開拍成功，希望可以順勢完成振朗嘅心願。

謝安琪獲頒最耀眼女演員獎。
同場嘅謝安琪（Kay）獲頒最耀眼女演員獎，Kay話希望挑戰練大隻嘅角色，突破斯文人妻框架。 講起日前佢喺社交平台大爆老公張繼聰話佢張素顏照同電影版嘅豬八戒撞樣，Kay完全冇嬲。

伍允龍生日正日要出席新戲嘅首映。
伍允龍（Philip）同時亦係九月壽星，9月16號生日正日Philip要出席新戲嘅首映，講起新戲Philip講得意義非凡，因為難得電影以武師幕後英雄為題材，同樣係武行出身嘅Philip可以參演份外覺得有使命感。

方力申將繼續忙內地嘅音樂會演出。
獲頒全方位藝人獎嘅方力申近年跳出自己嘅舒適圈多線發展，繼之前去咗巴黎採訪奧運之後，呢排又要重投歌手身份繼續內地嘅音樂會演出，因為工作繁忙，連日前內地奧運健兒訪港嘅大滙演，小方都話好可惜參加唔到。

陶大宇呢日獲邀擔任頒獎嘉賓。
陶大宇呢日獲邀擔任頒獎嘉賓，講到佢有份演出嘅江湖電影成績高開都令加盟入系列嘅大宇放下心頭大石，好開心朋友睇完佢嘅演出都一致正評。