董瑋相隔七年回歸幕前 劉俊謙 伍允龍熱血打出新境界

由劉俊謙、董瑋、伍允龍、蔡思韵主演，梁冠堯（Albert）、梁冠舜（Herbert）首次執導，講述香港動作演員辛酸經歷嘅電影《武替道》，即將喺9月26日熱血上映！電影以武師界三代唔同人物，訴盡香港影壇動作替身嘅血淚故事。

而喺演員陣容當中，最引人注目嘅就係曾兩奪金馬獎最佳動作設計，及七奪金像獎最佳動作設計，有「香港武術指導界的傳奇人物」之稱嘅董瑋，以「森哥」一角強勢回歸幕前！董瑋11歲進入影壇做童星，16歲轉做龍虎武師，曾喺李小龍《龍爭虎鬥》中演出及擔任武師之一，亦喺80年代初參演多部電視劇，演出大獲好評。 雖然董瑋不時都會以客串身份同大家見面，但呢次《武替道》就係佢相隔七年，再度回歸幕前之作。
董瑋
戲中佢飾演一位性格固執嘅過氣武指「森哥」，一心帶領年輕一代重拾香港動作片光輝。導演Albert就表示，選擇董瑋飾演「森哥」，是因為佢具有深厚背景同豐富演藝經歷，完美符合這個角色的需求，董瑋無論是氣場抑或演技，都展現出深厚功力，完美詮釋了戲中森哥一角。
劉俊謙
除了董瑋外，阿謙飾演嘅「龍仔」亦係關鍵角色。導演Herbert提到，要找到一位能夠表現出動作武師身手嘅年輕演員並不容易：「揾龍仔呢個角色某程度上係有啲挑戰，因為喺而家呢個市場，揾呢個歲數嘅人飾演，個身手同武師差唔多，其實係好困難。我哋後尾就選擇咗阿謙去做呢個角色。」
伍允龍
而絕對不能忽視嘅重要角色就係由伍允龍（Philip）飾演嘅「阿威」。戲中身為動作巨星嘅阿威，同森哥有極深矛盾。導演Albert就話，喺構思呢個角色時，佢第一個就係諗到Philip：「阿威除咗識打之外，唔多唔少Philip亦都可以投放佢自己嘅生活歷程喺嗰個角色入面，我覺得係一個加乘嚟嘅。」而Philip嘅動作實力同對角色嘅深刻理解，令佢嘅演出都極具說服力。
蔡思韵
電影中亦有唔少實力派演員助陣，蔡思韵飾演「森哥」女兒Cherry，同董瑋有連場感人對手戲。林耀聲以及新科金像獎最佳女配角梁雍婷，就飾演年輕時嘅「森哥」及其妻子，其他陣容有張達倫、車婉婉、吳瑞庭、杜燕歌等實力派演員，共同呈現出一個有血有汗故事。

而兩位導演都係動作演員出身，2006年入行拍攝第一套電影《雙子神偷》，及後二人曾一度離開影壇，輾轉之下決心追夢回歸影圈，皆因二人由始至終對香港動作片有深厚情感，Albert指戲中故事同他們武師經歷息息相關。

兩位導演亦特別提到今次創作深受偶像之一嘅洪金寶影響，Herbert回憶：「當年有機會同洪金寶拍《雙子神偷》（2006年）係一件好難忘嘅事。我記得有一日特登攞《東方禿鷹》DVD喺片場畀佢簽名。佢攞住隻DVD搖搖頭，感慨咁同我哋講『以前啲嘢拍唔返，最好嘅時間已經過咗』。我覺得呢句說話令我諗起，香港武師咁多年努力，幫香港動作片建立咗一個地位，貿貿然冇咗係一件好可惜嘅事。」呢句話深深影響兩位導演，佢地希望透過《武替道》向香港動作電影致敬，並傳遞出武師背後堅持同毅力嘅精神！