迷暈黨 | 港女皇崗口岸遇迷暈黨 離開即頭暈持一物保命 內地人問借用一樣嘢成新型騙局？

【迷暈黨/深圳/福田/皇崗口岸/頭暈】一名女網民在Threads發文，表示本周四（27日）在深圳福田皇崗口岸，遇到一名操內地口音、講廣東話的男子向她搭訕，問她借用無線網絡，她懷疑對方是「迷暈黨」。

女事主憶述先後3次遇見該男子，對方不斷跟她說話，她覺得有不妥便「調頭走」，未料上車後感覺輕微頭暈，形容「由頭暈到尾，差啲倒地」。她指幸好當時有佩戴口罩和有立刻離開，才不至於出事，「警世，戴口罩保命，我差啲暈咗喺關口，如果我唔係戴咗口罩同有啲警覺調頭走，應該畀人攬咗上車。唔好理人/被搭訕/借嘢，我諗番轉頭真驚，唔係講笑」。 

網民：你走甩算好彩

帖文曝光後，不少網民指事主算是幸運，「嗰度夜晚冇咩人，你走甩算好彩」、「差少少就可以喺詐騙電話度聽到你把聲」、「而家戴口罩除咗防護細菌，仲要防護迷暈黨」。

網民分享自身經歷 

另有網民分享自己的經歷和見聞，「之前有人話去泰國都係咁，有個路人同佢講嘢，之後就覺得好頭暈」、「我細佬去潮州玩，入咗一個廟宇，畀迷暈黨搞，自動自覺畀咗部電話人，好彩隔籬個女人提佢，事後佢話自己都唔知發生乜嘢事」、「我都試過一次，即刻要坐底休息咗半日先行到」、「呢個係真，大陸迷暈黨真係喺香港搵食，記住望都唔好望，佢畀咩你睇，手掌又好，地圖又好，總之所有嘢都唔好望，快啲走。識人睇咗個大陸人手掌就畀人迷暈咗，然後拎咗佢身上嘅錢同首飾，絕不誇張。佢哋專呃香港人，希望各位小心」、「係，有個大陸人問路，個地址寫咗喺手掌度，望吓咩地址，總之就佢手掌上面有啲嘢，但佢又記唔起係咩，總之望望吓就暈，好似邪術咁，真係解釋唔到」、「我之前喺香港茶記試過搭枱畀大陸人借Wi-Fi，原來借Wi-Fi係新型騙局」。

【延伸閱讀】

迷暈黨 | 將軍澳疑現迷暈黨 專向一類人下手 街坊曾中招：控制唔到身體

「迷暈黨」闊別多時重出江湖！大家出街記住要小心！

普通話男女廁門外🚾求送衛生巾 國內騙案殺入香港🔪背後目的拆解...細思極恐！⚠️北上深圳要小心