廣源邨兩車「互頂」爆粗爭執 再有後續影片流出：兇你就梗㗎啦 慢慢同你玩

沙田廣源邨上周六（10日）發生兩車「互頂」不相讓，繼而爭執爆粗事件，結果43歲本地男子涉嫌「刑事恐嚇」被捕。

網上今日（14日）再流出多一段雙方當時發生爭執的後續影片。平治一方有人不斷以粗言穢語，大罵私家車司機「兇你就梗㗎啦，X你老X」、「嗌X埋你老X教你揸車啦」。其間平治乘客更突然脫去上衣，赤裸半身，事件更驚動保安員到場調停。

平治男司機落車，與私家車司機發生爭執。(車CAM特警影片截圖)

後續片段見到，兩架車依然互不相讓，平治男司機繼續辱罵對方：「轉右唔X識走，識唔識揸車，X你老X。」私家車司機即時報警，但平治男司機疑似恐嚇指，「兇你就梗㗎啦，慢慢同你玩呀X頭。」又問對對方「你係咪喺度住呀？唔X識揸車學多幾年啦！」

平治男乘客突然脫去上衣，赤裸半身。(車CAM特警影片截圖)

但私家車司機重申對方逆線，指：「你逆線行過嚟我點走啫，你又霸住個位係咪呀？」但平治司機即時反駁：「你叫『白鮓』（交通警）嚟睇吓我啱唔啱！」

屋邨保安員亦到場調停，有人更向私家車司機指：「其實你可以兜出嚟，呢度好大條路，你塞住人呀。」平治司機亦大罵私家車司機：「你唔X識揸車學多幾年啦。」、「廢柴嚟㗎！」
屋邨保安員亦到場調停。(車CAM特警影片截圖)

涉事的其士富居物業管理有限公司回應傳媒查詢表示，有關的單線雙程行車措施，至今實施超過20年，主要因為屋苑範圍內設有小學，每當上課最少有5至6部校巴接載學童返學放學，但期間校巴掉頭離開有困難，故須圍封一邊路口，騰出足夠空間供校巴掉頭。