騎士獎2024丨姜皓文大馬獲「年度超凡傑出演員」 月尾新劇吉隆坡開工

演員姜皓文（黑仔）日前出席大馬第三季《騎士獎 2024》(The Knight Awards) 記者招待會並獲得大會頒發「年度超凡傑出演員」獎，黑仔稱馬來西亞畀佢一個好微妙嘅感覺，細個已聽屋企人講好多馬來西亞嘅故事，自己第一個電影獎項都喺馬來西亞一個電影節獲頒，對呢個地方好有感情。

黑仔日前出席大馬第三季《騎士獎 2024》(The Knight Awards) 記者招待會並獲得大會頒發「年度超凡傑出演員」獎。

黑仔又指第一次去檳城旅行已被當地所吸引，更視為自己嘅「後花園」，放假就會嚟充電加油。黑仔近年參與3部電影都係馬來西亞團隊所製作，即將開拍電視劇《無懼》亦喺馬來西亞取景，預計要逗留3個月，黑仔好多謝馬來西亞觀眾支持。

黑仔又指第一次去檳城旅行已被當地所吸引，更視為自己嘅「後花園」，放假就會嚟充電加油。

黑仔剛完成大馬懸疑恐怖電影《蠱降》拍攝，因劇情須苦練泰文對白，黑仔坦言每句泰文都幾棘手，佢讚同場有一位女演員讀得好叻，起初都以為對方係泰國人，講到該戲早前喺馬來西亞取景，亦到泰國合艾拍攝，黑仔趁住空檔時間與太太去遊玩、參觀寺廟及行夜市，遇上當地華人及遊客，感覺好親切，黑仔計劃下次旅程由檳城開車沿海去蘇梅島或曼谷玩。

黑仔剛完成大馬懸疑恐怖電影《蠱降》拍攝，因劇情須苦練泰文對白，黑仔坦言每句泰文都幾棘手。

黑仔月尾即將為新劇《無懼》喺吉隆坡開工，入行以嚟第一次與三哥苗僑偉喺電視劇合作，由於呢次拍攝要喺吉隆坡逗留一段時間，佢抱歉未能參與電影《談判專家》首映及謝票活動，佢仍然希望大家繼續支持香港電影，期待再次跟香港觀眾見面。
黑仔同老婆趁住空檔喺泰國合艾去遊玩、參觀寺廟及行夜市。