StarTalk｜裕美推出新歌講愛情觀 無意與林作結婚

裕美  (和田裕美)作客《StarTalk》接受 許文軒 專訪，相隔13年，裕美終於復出樂壇，推出新歌《最佳女友的自我修養》，裕美話因為網上討論區推舉自己係最佳女友，於是就促成推出呢首歌嘅題材。

裕美喺新歌中表達對愛情嘅睇法，以及如何修練自己。講起男友林作，裕美就話男友係一個好特別嘅人，佢自己足足用咗兩年時間，先識得分辨佢講嘢嘅真偽，所以同林作相處，好多時候都令自己好激心，好似出新歌嗰陣，裕美打算拍片，於是諗住早啲瞓養足精神嘅時候，林作竟然就喺當晚飲到酩酊大醉，搞到裕美全晚要照顧佢而無覺好瞓。

為免要經常同林作鬥智鬥力，裕美就駛出一招「當佢透明」，原來對於無時無刻要引人關注嘅林作嚟講，咁先係最大嘅懲罰。

同林作拍拖將近六年嘅裕美，就承認當初同林作媽媽嘅關係真係好差，林媽媽更盡量避免同裕美有接觸，裕美話林媽媽之所以唔太鐘意佢，係因為自己嘅年齡比林作大，加上自己好多負面新聞，背景亦都唔太好，但之後林作因為惹上唔少風波，裕美卻一直不離不棄，令林媽媽對裕美徹底改觀，對於有網友猜測佢哋三位，由此至終都係度自編自導自演鬧劇，裕美就叫大家唔駛諗得咁複雜，因為所有嘢都係真實呈現喺大家面前。

至於講到結婚呢個咁重大嘅決定，裕美就話要慎重考慮，之前林作就誇下海口，話如果裕美喺音樂頒獎禮上攞到獎項，就話向佢求婚，裕美就搞笑回應「佢講完呢句之後，即刻唔知想唔想攞？」裕美話未必接受佢求婚，係因為佢覺得林作一直只想出名，所以心底未必真心想結婚，佢只係想得到大眾關注，同埋諗起佢嘔到一地都係，要照顧佢嘅畫面，已經覺得好倒胃啦，呢對情侶真係認真特別﹗