中聲一唱將分組落力綵排 李佳感激羅啟豪無私付出

《中年好聲音》唱將 李佳 羅啟豪 顏志恒 同 林鉫徫 喺嚟緊舉行嘅演唱會，會組成Acapella小隊演出其中一個環節，好快就到開騷日子，佢哋話因為無乜時間籌備表演環節，所以好感激Ramon喺背後付出，用咗成個通宵設計Acapella環節音樂，Ramon都承認唔夠瞓，不過埋位做嘢就會精神。

首次聯手作Acapella演出，四位唱將本身都係主唱演出，今次要協調互相配合，仲要唱唔同崗位，的確係有難度同壓力。Benson仲解釋點解唱嘅過程中會合埋眼，因為驚見到靚仔靚女拍檔們會分心。

周吉佩、吳大強同 丁文俊 都有為演出綵排，大家亦為騷上嘅個人演出環節賣力準備，吉吉同丁文俊就話Bill哥哥獻唱嘅歌曲係大家估唔到，丁文俊就話同魏嘉信有勁歌熱舞環節，呢項表演亦係佢嘅突破。