薛家燕感悟身體健康重要性 七公主計劃旅行賀60周年

薛家燕 日前出席一個保健產品代言活動，又同大家一齊做健康操，玩得非常開心。家燕姐亦有報平安，指佢之前不慎整親腳嘅傷勢已經康復，叫大家唔好擔心。家燕姐向來都鍾意四出登台同各地粉絲見面，不過近年佢都因為身邊陸續有朋友離世而開始感悟到要更珍惜眼前人同埋身體健康嘅重要性，雖然有少少唔習慣，但都肯聽阿女講，將工作攤長慢慢做。
 
而出年就係「七公主」60周年，家燕姐都好感恩可以同一班姊妹長久keep住深厚友情，佢亦笑言經常同姊妹們分享養生之道，又因為工作太忙而被陳寶珠「投訴」太難約見面。雖然「七公主」未必有機會工作上合作，但為慶祝周年紀念，佢地都打算出年相約去旅行。
 
至於有冇心儀旅行地方？家燕姐就話姊妹們推薦去三亞享受陽光與海灘，不過家燕姐就講明自己唔著比堅尼，非常好笑。另外，家燕姐最近亦成為《繁花》劇迷，心思思想去上海參觀劇集取景地點，同堆品嚐劇中同款美食啊。