蔣家旻大方認愛後首談戀情發展經過 由朋友成戀人讚另一半成熟淡定

蔣家旻（Angel）今年二月元宵節貼出東京鐵塔收花相認愛，透露同圈外一位識咗好耐嘅朋友發展成戀人，拍拖超過一年，早前蔣家旻同一班姊妹為湯洛雯慶祝生日兼同朱千雪搞產前派對，蔣家旻嘅男友更喺合照首度曝光。

蔣家旻男友從事電視製作多年，二人工作時認識，蔣家旻亦喺認愛後首度親自講拍拖經過，透露要從友達以上戀人未滿發展成為情人，感覺好奇妙：「我同男友經已認識有10年，一直係好好朋友，之前從來沒有發展嘅諗法，但一切發生得好自然，可能自己成熟咗，一直呢個人都好支持自己，留意自己，知道佢人品唔錯，工作又上軌道，當大家傾偈話題深入咗，開始發現呢個人可以發展。」

蔣家旻最終用咗超過一月時間考慮係咪展開呢段新戀情，更大讚男友將自己放喺首位，直言自己係一個易急燥嘅人，同男友比較成熟淡定嘅性格有互補作用。