姜大衛入行73年初心不變 與李琳琳奉女成婚認前衛又反叛

姜大衛（John哥）日前接受電台主持訪問，童星入行至今已73年，John哥當初係由父母帶入行，皆因父母做呢行，咁啱又要搵小演員，John哥認為：「個天揀我，後來觀眾揀，直到依家。」

John哥同太太李琳琳結婚至今，走過50年個年頭，大爆兩人相識經過。

John哥入行至今仍保持初心，由於係自己鍾意做嘅職業，就算有幾辛苦都冇怨言，「我一生人過得幾燦爛、幾滿足，4歲由童星做到依家，完全冇埋怨過，唔知點解，一定係好鍾意呢行，唔覺得攰。」John哥回想小時候拍戲好開心，因為賺錢又唔使返學，「我十幾歲就做主角，五百蚊一部戲，後期做武師就鍾意拍打戲，邵氏搵親我哋係拍武打片，當年後生唔知咩叫辛苦，日頭打完，夜晚收工就出去打保齡、打枱波。」

John哥入行至今仍保持初心，由於係自己鍾意做嘅職業，就算有幾辛苦都冇怨言。

John哥同太太李琳琳結婚至今，走過50年個年頭，大爆兩人相識經過係喺婚禮上，「當年石天結婚，佢做伴娘，我同朋友去飲，其實同佢都識，但唔係好熟，之後梗係我追佢啦！」主持譚玉瑛就話：「當時喺觀眾眼中，佢（李琳琳）好似飛女，成日着迷你裙又化妝，係時代尖端女性，就算你成日拍武打片，但你又好文靜。」John哥笑指係緣份，唔知鍾意佢對方啲咩。

John哥形容兩人係敢作敢為，覺得結婚好正常，當年仲係奉女成婚。

問到John哥當年同李琳琳拍拖有咩考量？John哥形容兩人係敢作敢為：「真正嘅明星係唔可以公開戀情，驚粉絲唔鍾意，同埋影響票房，但我個人好反叛，覺得結婚好正常啫，我仲係奉女成婚，冇大排筳席，我哋係天主教徒，只係去教堂結婚，夜晚飲完第二日就飛咗去度蜜月。」John哥又話：「我係飛仔，佢係飛女，都係反叛，但結婚係我哋私事，唔需要交代，只要我向佢交代，佢向我交代，好聽啲係前衛，我哋係為咗目的不擇手段。」